Għawdxi ta’ 33 sena ma nstabx ħati li f”Marzu ta’ ħames snin ilu b’ nuqqas ta’ ħsieb u traskuraġni kkaġuna feriti gravi fuq mara meta tajjaraha bil-karozza fis-Swieqi.
Il-Qorti fis-sentenza tagħha qalet li l-mara qasmet f’daqqa u dan wara li ħarġet minn wara vann bil-konsegwenza li Hugo Mamo ma kellux il-viżjoni ikun alert u jevita l-inċident hekk kif Carmen Sammut qasmet it-triq.
Mamo lanqas nstab ħati mill-Maġistrat Caroline Farrugia Frendo li fit-2 ta’ Marzu tal-2015 għall-ħabta tas-6.45pm. fi Triq is-Slielem, li kien qed isuq b’manjiera traskurata u b’velocità eċċessiva.
Carmen Sammut qalet fil-Qorti li dak inhar tal-inċident żewġ sorijiet għaddew għaliha biex iwassluha sabiex tagħti l-lezzjoni tad-duttrina lit-tfal f’Baħar iċ-Ċagħaq.
L-inċident seħħ fid-direzzjoni lejn Triq St. Andrew’s fi trejqa li tagħti ghal Madliena. Qalet li hija kienet miexja normali u ma kienx hemm karozzi għaddejjin.
Hija lemħet lil żewġha fil-kantuniera u fil-pront sabet ruħha fuq il-bonett tal-karozza. Carmen Sammut spiċċat b’feriti f’wiċċha u b’ċertu għadam imfarrak.
Kellha wkoll ‘blood clot’ f’moħħa li eventwalment telqet waħedha. Qalet li ma tantx kien hemm dawl fit-triq fejn seħħ l-inċident. Żewġha Carmelo Sammut qal li kien qed jistenna lil mara tiegħu, bil-kelb. Huwa kien faċċata ta’ fejn seħħ l-inċdent madwar 10 passi l-bogħod.
Ikkonferma li fit-triq setgħu jipparkjaw il-karozzi. Meta lemaħ lil martu ġejja lejh, fil-pront għaddiet karozza u ra lil martu ttir il-quddiem u taqa’ quddiem il-karozza mal-art.
Qal li l-karozza li tajret lil martu kienet BMW u kienet ġejja mid-direzzjoni ta’ San Ġiljan b’ċerta veloċità. It-triq ma kinitx waħda dritta, u allura l-karozza kellha tikser xi ftit għat-triq.
Hugo Mamo fix-xhieda tiegħu spjega li dak inhar tal-inċident kif kien se jitla’ t-tela’ għall-Madliena, raha raġel bil-kelb tiegħu fuq in-naħa tax-xellug tat-triq, li kienet mudlama.
Hu u tiela’ t-tela’, raha karozza oħra nieżla u bid-dawl tal-istess vettura, f’xi ħin nnota mara li dlonk ħarġet minn wara l-karozza li kienet nieżla u għalhekk ma rahiex mill-ewwel.
Huwa laqatha fuq in-naħa tax-xelluga, fejn ikun hemm ix-xufier. Ċaħad li kien għaddej b’ċerta veloċita u dan jista’ jiġi ppruvat anke mir-ritratti fejn, mid-daqqa tal-impatt jidher li ma kienx hemm ħsarat fil-karozza u allura żgur li ma setax kien għaddej b’veloċità eċċessiva.
Id-difiża mhux biss qalet li l-inċident ma kienx tort tas-sewwieq, iżda tenniet ukoll li l-każ huwa wieħed preskritt, xi ħaġa li l-Qorti ma skartat mill-ewwel.
Il-Qorti iżda qieset sew l-argumenti tad-difiża li fil-ħin tal-inċident kien dlam ċappa u Triq is-Slielem tidher tela’ mxeqilba ftit il’fuq, u t-traffiku kien ġej mill-istess triq opposta. Il-mara qasmet mara minn naħa tar-‘railings’ għan-naħa tal-bankina.
Il-Qorti qalet li mill-provi ma jirriżulta minn imkien l-fatt li l-imputat kien qed isuq b’veloċità eċċessiva jew li tilef il-kontroll tal-karozza tiegħu jew li skiddja u għalhekk il-Maġistrat Farrugia Frendo qalet li mhijiex moralment konvinta li s-sewqan tal-imputat kien bla kont u traskurat.
Il-Qorti thoss li l-inċident seħħ minħabba każ ta’ meta persuna taqsam f’daqqa u tissorprendi lis-sewwieq. jew tagħmel xi moviment insolitu u mhux mistenni u mhux ghaliex l-imputat saq b’mod traskurat jew perikoluz. Għal dawn il-motivi ma ssibx lil Hugo Mamo ħati ta’ l-akkuzi kollha kif miġjuba kontrih u għalhekk tilliberah minn kull ħtija u piena.
