Dan hu kummentarju dirett bil-kitba mill-iStadium Nazzjonali f’Ta’Qali.
Tmiem il-partita. Rebħa oħra għal Malta. Dan it-tim, dawn il-plejers qed jagħtuna gost ta’ vera. Issa nħarsu b’ottimiżżmu u b’kuraġġ għall-partita ta’ nhar it-Tlieta li ġej, fid-8:45pm, kontra l-Gżejjer Faroe, f’Ta’ Qali. Grazzi talli kontu magħna għal dan il-kummentarju dirett, bil-kitba. Forza Malta!
93 min | Malta tiskorja permezz ta’ Shaun Dimech. Kienet azzjoni tajba ta’ Jake Grech li kkonkluda lejn il-lasta, Gomes salva parzjalment u ż-żagħżugħ Belti, li kien għadu kemm daħal bħala sostitut, Dimech daħal tajjeb biex skorja l-ewwel gowl tiegħu ma’ Malta. Gowl! X’ferħ! Kemm nieħu gost bħala Malti ngħix dawn il-mumenti, nara l-Malta tirbaħ, tilgħab tajjeb u fuq kollox iż-żgħażagħ tagħna jagħtuna kuraġġ għall-futur.
90 min | Ir-referee Slovakk se jkun qed jagħti erba’ minuti ta’ ħin miżjud.
89 min | Jake Grech u Shaun Dimech jidħlu jilgħabu minflok Jurgen Degabriele u Luke Gambin.
Lesti biex jidħlu dalwaqt żewġ plejers oħra Maltin. Jake Grech u Shaun Dimech.
84 min | Jinbidel Matthew Guillaumier ma’ Steven Pisani.
77 min | Andorra jagħmlu żewġ sostituzzjonijiet oħra fil-partita. Jidħlu jilgħabu Victor Bernat u Luis Blanco minflok Cristian Martínez u Marc Rebés rispettivament.
76 min | Jidħol jilgħab Alex Satariano minflok Luke Montebello.
75 min | Malta sfortunata li ma tiskorjax anke f’din l-azzjoni. L-ewwel minn azzjoni minn fuq ix-xellug tal-gowlkiper t’Andorra, bix-xutt angolat ta’ Mbong ikun imbiegħed parzjalment minn Gomes, il-ballun jiġi f’saqajn il-Ħamruniż Guillaumier, iżda l-konklużżjoni tiegħu kienet imblokkata fil-ħin mis-sostitut Luigi San Nicolas.
Malta mistennija tagħmel l-ewwel bidla tagħha dalwaqt. Lest biex jidħol jilgħab iż-żagħżugħ ta’ Sliema Wanderers, Alex Satariano.
69 min | Żewġ sostituzzjonijiet għal Andorra; Jidħlu jilgħabu Luigi San Nicolas u Aaron Sánchez minflok Alex Martínez u Ricard Fernandez rispettivament.
68 min | Malta viċin it-tielet gowl fil-partita, iżda minn posizzjoni angolata, Ryan Camenzuli spara għoli.
Malta inkredibilment fil-vantaġġ b’żewġ gowls fi spazji ta’ tliet minuti.
59 min | Malta terġa’ tiskorja. Gowl ieħor. Azzjoni minn fuq ix-xellug tal-lasta avversarja, Luke Gambin jixhet kross lejn il-nofs tal-kaxxa u l-attakkant qsajjar ta’ Hibernians, Jurgen Degabriele għola tajjeb bir-ras biex xeħet wara l-gowlkiper avversarju għall-gowl tal-vantaġġ. Malta 2 Andorra 1. X’logħba din. X’prestazzjoni din mill-Maltin!
56 min |Gowl għal Malta. Kienet azzjoni li bdiet minn corner ta’ Teddy Theuma, u d-difensur Emili Garcia f’tentattiv li jtajjar il-ballun ‘il bogħod, xeħet fix-xibka tiegħu stess. Malta tiskorja l-gowl tad-dro b’mod meritat.
53 min | Daħla kerha ta’ Cristian Martínez fuq Kurt Shaw, bir-referee mhux talli ma keċċiħx, talli lanqas urieħ is-safra. Deċiżjoni tassew kontroversjali.
51 min | Karta safra għal Luke Montebello.
49 min | Karta safra għal Albert Alavedra t’Andorra, wara fawl fuq Luke Montebello.
Bidu tat-tieni taqsima
Fl-ewwel taqsima kelna erba’ konklużżjonijiet lejn il-lasta, kontra l-uniku wieħed li kellhom l-avversarji, u 81 fil-mija eżżatezza fil-passaġġi tagħna, kontra d-49 fil-mija t’Andorra. Minkejja dan, l-iskor kien kontra tagħna u t-tieni 45 minuta kienet opportunitá għall-plejers tagħna li nagħtu prova tal-potenzjal tagħna.
Tmiem l-ewwel taqsima
Tintemm l-ewwel taqsima. Malta ssofri gowl kmieni fil-partita, f’azzjoni sfortunata u li stajna evitajna bi ftit aktar attenzjoni. Jista’ jagħti l-każ li skont l-interpretazzjoni tar-regoli, il-gowl t’Andorra kellu jkun imħassar għal offside. Mill-bqija konna aħjar mill-avversarji. Fl-ewwel 45 minuta diġa’ kelna 71 fil-mija tal-pussess u ersaqna kemm il-darba lejn il-gowl, inkluż f’azzjoni ta’ Teddy Theuma li ħabtet mal-mimduda.
Mingħajr Devis Mangia fuq il-bank u Steve Borg fid-difiża, it-tnejn sospiżi, kif ukoll Zach Muscat li ttestja pożittiv għall-COVID-19 ftit tal-jiem ilu, s’issa Malta kellna kollox barra fortuna. Nittamaw li t-tieni 45 minuta jkunu aħjar u jirnexxilna nndawru l-affarijiet favur tagħna.
45 min | Minuta ta’ ħin miżjud fit-tmiem tal-ewwel taqsima.
34 min | Malta nerġgħu nkunu qrib il-gowl. Azzjoni minn fuq il-lemin tal-lasta avversarja, ballun f’saqajn Ryan Camenzuli li xeħet kross fil-baxx lejn in-nofs, il-ballun kien imxellef mid-difensur t’Andorra, u minn mal-art Gomes salva parzjalment. Mir-rebound, Luke Gambin ikkonkluda dirett lejn il-lasta iżda Albert Alavedra kien deċiżiv biex jimblokka dak li setgħa kien il-gowl tad-dro tal-Maltin.
28 min | Malta tolqot il-mimdunda. Kienet konklużżjoni minn barra l-kaxxa ta’ Teddy Theuma, il-gowlkiper Josep Gomes megħlub, iżda l-ballun jaħbat mal-lasta u baqa’ sejjer barra.
17 min | Karta safra għall-captain ta’ Andorra, Marcio Vieria għal fawl fuq Matthew Guillaumier.
13 min | Malta tfittex il-gowl tad-dro. Azzjoni tajba minn fuq ix-xellug tal-lasta avversarja. Joseph Mbong jagħti lejn l-attakkant Luke Montebello, b’dan tal-aħħar jikkonkludi għoli.
Għal Andorra, dan il-gowl kien l-ewwel wieħed tagħhom f’din il-kompetizzjoni u l-ewwel wieħed li soffrejna bħala tim nazzjonali wara erba’ partiti li fihom dejjem kelna clean sheet. Id-difiża Maltija dehret maħsuda.
3 min | Jiskorjaw Andorra minn azzjoni li bdiet minn free-kick mogħti minn Joan Cervós. Il-gowl ikun skorjat minn Marc Rebés.
Bidu tal-partita
Malta b’tim mibdul mill-aħħar partita li biha l-kowċ nazzjonali beda l-partita kontra Liechtenstein.
Il-kowċ Malti Devis Mangia hu sospiż għal din il-partita. Flimkien miegħu hemm ukoll nieqes id-difensur ċentrali ta’ Gżira United, Steve Borg li ukoll qed jiskonta sospensjoni ta’ partita waħda.
Fin-nuqqas ta’ Mangia minn fuq il-bank, it-tim qed jitmexxa minn Davide Mazzotta; eks membru fl-istaff tekniku ta’ Antonio Conte meta kien ma’ Chelsea.
Merħba għall-partita tal-lum
Merħba għall-partita tal-lum bejn Malta u Andorra. Din il-partita hija valida mill-grupp tal-UEFA Nations League, kategorija D.
Il-formazzjonijiet taż-żewġ timijiet se tkun din:
Malta | 1 Henry Bonello; 3 Ryan Camenzuli; 4 Karl Micallef; 5 Andrei Agius; 6 Matthew Guillaumier (84 10 Steven Pisani); 7 Joseph Mbong; 9 Luke Montebello (75 min 22 Alex Satariano); 13 Kurt Shaw; 17 Teddy Teuma; 18 Jurgen Degabriele (89 min 8 Jake Grech); 20 Luke Gambin (89 min 21 Shaun Dimech)
Andorra | 1 Josep Gomes; 2 Cristian Martínez (77 min 22 Victor Bernat); 3 Albert Alavedra; 4 Marc Rebés (77 min 18 Luis Blanco); 5 Emili Garcia; 7 Alex Martínez (69 min 13 Luigi San Nicolas); 8 Marcio Vieira; 14 Jordi Aláez; 15 Moisés San Nicolás; 16 Ricard Fernandez (69 min 9 Aaron Sánchez); 17 Joan Cervós
Karti sofor – Marcio Vieria (Andorra), Albert Alavedra (Andorra), Luke Montebello (Malta)
Skorjaw | 3 min Marc Rebés (Andorra); 56 min Emili Garcia og (Malta); 59 min Jurgen Degabriele (Malta); 93 min Shaun Dimech (Malta)
Referee | Peter Kralović (Slovakkja)
