Il-Union of Professional Educators – Voice of the Workers ġiet infurmata li l-ewwel dożi ta’ vaċċin tal-COVID-19 se jiġu amministrati lil kategoriji speċifiċi. Il-kategoriji msemmija bħala prijoritizzati għal dan l-ewwel grupp ta’ vaċċini huma l-frontliners, l-uffiċjali tal-infurzar tal-liġi tagħna u l-anzjani.
L-għaqda tħeġġeġ lill-gvern biex jikkunsidra l-edukaturi tagħna bħala frontliners f’dan il-mument, minħabba n-numru kbir ta’ nies li qed jiġu esposti għalihom kuljum, u b’hekk jiżdied sostanzjalment ir-riskju li jittestjaw pożittivi u jxerrdu l-virus b’mod involontarju.
Il-każijiet numerużi misjuba fl-iskejjel matul ix-xhur li għaddew u l-perjodi ta ’awtoiżolazzjoni, jew kwarantina li l-edukaturi tagħna kellhom iħabbtu wiċċhom magħhom, kienu qed jgħabbu lill-edukaturi tagħna b’piż qawwi.
Li nħallu lill-edukaturi tagħna l-possibbiltà li jirċievu t-tilqima, ser inaqqsu r-riskju li l-iskejjel ikunu nieqsa mill-għalliema, minħabba l-każi fost l-edukaturi. Dan il-vaċċin jiggarantixxi wkoll il-paċi tal-moħħ lill-edukaturi tagħna, li ilhom jaħdmu bla waqfien biex jiżguraw li l-edukazzjoni li jistħoqqilhom uliedna, titwassal minkejja l-pandemija, u l-avvenimenti mhux mistennija li ilhom jakkumpanjawha minn Marzu.
