Il-qawwiet militari tal-Ażerbajġan, fl-aħħar sigħat, daħlu u okkupaw l-aħħar distrett li kellha ċċedi l-Armenja bħala parti mill-ftehim li kien temm il-ġimgħat ta’ battalji għall-kontroll tar-reġjun ta’ Nagorno-Karabakh.
Il-militar Ażeri — fosthom tankijiet tal-gwerra u trakkijiet – daħlu fid-distrett ta’ Lachin u fejn kien hemm jakkumpanjawhom il-vetturi militari tar-Russja li sponsorjat l-aħħar ftehim għall-paċi bejn l-Ażeri u l-Armeni.
L-Armenja qablet biex tgħaddi tliet distretti madwar Nagorno-Karabakh – Aghdam, Lachin u Kalbajar – bħala parti mill-patt li ntlaħaq biex tieqaf l-offensiva tal-qawwiet tal-Ażerbajġan fil-konflitt ta’ ġimgħat ilu. Il-konflitt intemm fi trijonf għall-Ażeri li ħatfu lura diversi artijiet li kienu ntilfu lis-separatisti Armeni maqtul il-gwerra tas-snin disgħin f’Nagorno-Karabakh.
Qabel daħlu l-militar Ażeri, ir-residenti ta’ Lachin – l-istess bħalma għamlu r-residenti ta’ Aghdam u Kalbajar – għamlu li setgħu biex joħorġu mill-inħawi fil-ħin u aċċertaw li ma jħallu xejn warajhom ‘għas-suldati tal-għadu’. Dan waqt li numru ta’ residenti anki taw in-nar lid-djar tagħhom f’Lachin u l-madwar.
Il-ftehim għall-paċi jisħaq għall-preżenza ta’ xi 2,000 suldat Russu għaż-żamma tal-paċi f’zona li tissepara lill-Armeni u l-Ażeri. Iz-zona tinkludi rotta minn Lachin li tgħaqqad il-belt ewlenija ta’ Stepanakert (f’Karabakh) mal-Armenja.
