L-investigaturi fir-Russja arrestaw raġel li hu suspettat dwar il-qtil ta’ mill-anqas 26 nisa anzjani fiz-zoni lejn iċ-ċentru tal-pajjiż, bejn l-2011 u l-2012. Il-qattiel – li kien anki jisraq lill-vittmi tiegħu – issemma bħala Radik Tagirov u meta nqabad, instab li hu, snin ilu, kien ingħata kundanna mill-qorti dwar serq.
Issa, isem Tagirov – imlaqqam ‘il-Manjaku tal-Volga’ – qed ikun marbut mal-omiċidji li twettqu fir-reġjuni maġenb ix-Xmara Volga.
Kelliema għall-Pulizija, intant, qalu li s-suspettat jinsab għaddej minn interrogazzjoni fit-tul u fejn hu ipprovda ‘informazzjoni siewja għall-investigazzjoni.’
L-arrest tiegħu sar possibbli b’riżultat ta’ riċerka forensika u analiżi bioloġika li indikaw li l-atti kriminali kontra n-nisa twettqu minn ‘individwu’. L-investigaturi qed jallegaw li Tagirov, residenti f’Kazan, kien jippoża bħala ħaddiem tal-manutenzjoni biex jidħol fid-dar tan-nisa anzjani u fejn, imbagħad, kien jispiċċa jgħallaqhom u jisraqhom.
//= $special ?>