Neil Robertson rebaħ it-titlu tal-Kampjonat tal-Ingilterra, fejn għeleb lin-numru wieħed tad-dinja Judd Trump fil-finali, bl-iskor ta’ 10-9. Dan kien it-tielet titlu ta’ din il-kompetizzjoni fil-karriera tiegħu.
Kienet finali missielta sal-aħħar, hekk kif sa tmiem l-ewwel sessjoni kienu fi draw ta’ 4-4, u qatt ma kien hemm iżjed minn frame wieħed ta’ differenza bejniethom. Trump kien minn fuq 9-8, iżda Robertson kiseb id-draw għal darb’oħra. Fl-aħħar frame, Trump kien jidher li ħa jikseb it-titlu, iżda żbalja fuq il-boċċa r-roża u Robertson ħataf l-opportunità biex idawwar ir-riżultat.
L-Awstraljan li huwa klassifikat it-tieni l-aqwa fid-dinja, flimkien mat-trofew kiseb ukoll £200,000, fir-rebħa tiegħu fil-Marshall Arena ġewwa Milton Keynes bil-bibien magħluqa.
