Ir-regolaturi tat-tilqim kontra l-coronavirus wissew li n-nies li għandhom storja ta’ reazzjonijiet allerġiċi sinifikanti mgħandhomx jingħataw it-tilqima prodotta mill-Pfizer/BioNTech. Dan meta mistennija aktar studji, ‘il quddiem, biex ir-riċerkaturi jindirizzaw aħjar il-probolema.
It-twissija ngħatat wara li żewġ ħaddiema mal-NHS — is-servizzi tas-saħħa fir-Renju Unit — sofrew xi reazzjonijiet allerġiċi fl-aħħar sigħat wara li ngħataw id-dożi speċifiċi. Ir-reazzjonijiet rispettivi kienu innutati ftit wara li l-ħaddiema ngħataw it-tilqima, b’dawn iż-żewġ persuni, issa, ‘jinsabu tajbin’.
L-indikazzjonijiet huma li ż-żewġ ħaddiema setgħu batew ‘side effects’ bħal nuqqas ta’ nifs u raxx fuq il-ġilda. Lanqas (għalissa) mhuma esklużi sitwazzjonijiet fejn persuna li tbati mill-allerġiji tinżlilha l-pressjoni wara li tingħata t-tilqima tal-Pfizer.
Dan meta ż-żewġ ħaddiema it-tnejn għandhom storja ta’ allerġiji serji — bil-Professur Stephen Powis, id-direttur mediku għall-NHS fl-Ingilterra, isostni li ‘l-individwi inkwistjoni qegħdin jirkupraw tajjeb mir-reazzjonijiet għat-tilqim’.
Intant, il-Medicines and Healthcare products Regulatory Agency qalet li din it-twissija qed tapplika b’mod partikulari lin-nies li, fil-passat, kellhom ir-reazzjonijiet ‘għall-mediċini, l-ikel jew il-vaċċini’.
