“Ma naf bl-ebda ‘side letter” ta’ €100 miljun iffirmata minn Konrad Mizzi. Sirt naf b’dan kollu mill-media u iva l-ftehim tal-Vitals li ġie ffirmat minn Konrad Mizzi ma’ Stewart u nemmen li l-Ministeru tal-Finanzi kellu jiġi nfurmat ukoll mill-kabinett dwar dan.
“M’għandiex informazzjoni li Malta tkun tista’ tagħmel tali garanzija. “Fuq il-€100 miljun ma nafx xejn.” Edward Scicluna f’kelma waħda tenna li ma kienx jaf x’qed jiġri, għax kollox kien f’idejn il-Ministeru tas-Saħħa.
Sadanittant il-Qorti waqt is-seduta marbuta mal-Vitals qalet li kienet irċeviet rikors minn Konrad Mizzi li kien ukoll ordnat jitla’ jixhed iżda ma setax jattendi minħabba li ħass is-sintomi tal-COVID-19 u wara li għamel it-testijiet issa qed jistenna riżultat, li sakemm ikollu r-riżultat tat-test jinsab fi kwarantina.
Id-difiża mmexxija minn Adrian Delia li fetaħ il-kawża u l-Avukat tiegħu Edward Debono qalet li din ma kinitx l-ewwel darba li Konrad Mizzi kien mitlub jixhed u m’attendiex u saret talba biex jiġi preżentat ċertifikat minn tabib dwar dan.
Kellu jixhed ukoll l-eks Prim Ministru Joseph Muscat li kien mitlub biex jixhed fil-kawża li qed tinstema’ quddiem l-Imħallef Francesco Depasquale, imma ma xehedx wara li kien milqugħ rikors li huwa ppreżenta fit-3 ta’ Diċembru li għadda peress li jinsab imsiefer. Huwa qal fir-rikors li kien lest jixhed f’seduta oħra fil-futur.
Ix-xhud prinċipali għalhekk kien l-eks Ministru tal-Finanzi Edward Scicluna li qal li kien hemm tħassib fi ħdan il-Ministeru tas-Saħħa dwar l-arranġament li sar, iżda tenna li din hija l-opinjoni tiegħu, mhux fatt.
L-Avukat Edward Debono qal li kien wara li bdiet din il-kawża, li Konrad Mizzi ffirma obbligu ta’ €100m. “Ma naf xejn fuq dawn il-flejjes u li dan il-ftehim qatt ma rajtu,” qal Edward Scicluna.
“Dan ma kienx parti mill-konċessjoni oriġinali. Il-Ministeru tiegħek ma kienx infurmat dwaru?” staqsa l-Avukat. Scicluna qal li s-Segretarju Permanenti jirċievi minuta mill-kabinett dwar xi ħaġa approvata li tikkonċerna l-finanzi.
Debono staqsa jekk kienx hemm xi minuta bħal din mill-kabinett. Scicluna qal, “m’għandix informazzjoni dwar dan. Ma niftakarx. Żgur li ma kienx hemm karta mill-kabinett, forsi ssemmiet bil-fomm”.
L-Avukat Debono staqsa dwar Konrad Mizzi li kien qabel ma’ klawsola ta’ €100 miljun anke jekk il-Gvern kellu jilef il-kawża, u x’kienet il-pożizzjoni tal-Ministru tal-Finanzi.
Meta saret il-preżentazzjoni f’Kastilja l-ftehim kien diġa’ ffirmat
Edward Scicluna qal li t-tweġiba tinsab fil-mistoqsija. “Il-ftehim kien diġà ffirmat meta ngħatat il-preżentazzjoni f’Kastilja. Aħna sirna nafu wara.” Ridna li jkollna f’idejna biex niċċekkjawha, klawsola b’klawsola. Imma għalxejn. Ma kellniex idea meta kienu diġà ġew iffirmati,” huwa qal.
Scicluna kien mistoqsi jekk il-kabinett kienx infurmat dwar enfitewsi temporanja fuq proprjetà marbuta ma’ l-isptar San Luqa. Huwa qal li ma jistax jeskludi li dak il-kabinett qalulu, u li ma ra l-ebda burokrazija dwar dan u fl-istess ħin qal li ma jiftakar xejn.
“Meta rajt il-konċessjoni l-ewwel darba kien fatt konkluż qal Scicluna”, huwa ġie mistoqsi, iva, huwa sostna, u qal li l-konċessjoni tas-servizz kienet kemmxejn riskjuża. Skont hu fit-teorija hija sitwazzjoni fejn jirbaħ kulħadd, bħalma huma l-konċessjonijiet kollha tas-servizzi ma’ entitajiet privati .
L-Avukat Edward Debono staqsa dwar pjanijiet għal 450 sodda tal-isptar fl-isptar Ġenerali ta’ Għawdex, biex jintużaw għat-turiżmu mediku, u li s’issa għadhom ma mmaterjalizzawx. Il-kabinett għamel xi ħaġa biex jieħu lura din il-proprjetà?
Scicluna qal li peress li din hija konċessjoni ta’ servizz taħt il-Ministeru tas-Saħħa, mhix kompetenza tal-Ministeru tal-Finanzi. L-eks Ministru qal li d-deċiżjoni kienet dejjem li tagħti lill-konċessjonarju n-nifs.
Dwar xogħol sar fl-isptarijiet Scicluna qal li ma jafx u jaf biss dwar dan daqs kemm jafu n-nies tat-triq. L-Avukat Debono qal li l-kera tal-art għadha għaddejja, il-Gvern ma jistax jiġbed it-tapit fuq il-ftehim? Scicluna tenna li l-kwistjoni nqabżet b’avvenimenti ġodda.
Qal li wieħed jispera li l-konċessjonarju l-ġdid Steward, jirranġa l-affarijiet. Scicluna qal li bħala Ministru tal-Finanzi, is-somma finanzjara trid tkun ċara u approvata. Iżda huwa f’idejn il-Ministru tas-Saħħa li jara li l-ftehim qed jiġi rispettat. “Mhux qed nipprova nfarfar,” huwa kompla jgħid.
Adrian Delia beda jagħmel il-mistoqsijiet lil Edward Scicluna fosthom dwar meta ġiet ifformulata l-idea tal-privatizzazzjoni tat-tliet sptarijiet tal-istat. Scicluna qal li -idea nbniet pass pass u li kienet wegħda fil-programm elettorali.
“Fis-17 ta’ Novembru, 2014 kont qrajt diskors dwar il-baġit li fih ssemma l-Isptar San Luqa. Delia jinnota li l-MOU ma’ Vitals ġie ffirmat xahar qabel Scicluna għamel dak id-diskors. Hawn ukoll Scicluna deher ħafna xettiku dwar dak li ġara.
Delia wera lix-xhud l-MOU, datat l-10 ta ’Ottubru, 2014 u staqsa u ndika min iffirma dak id-dokument? Scicluna qal li hemm ħafna firem, imma hemm ukoll ta’ Chris Cardona.
Il-Ministeru tal-Finanzi ma daħalx fil-merti tal-MoU’s
Scicluna qal li l-Ministeru tal-Finanzi ma daħalx fil-merti tal-MoUs iffirmati mill-Malta Enterprise, u li dan ma kienx differenti. Fil-kawża fejn Adrian Delia qed jitlob biex l-isptarijiet jerġgħu jingħataw lura lill-poplu Malti, Scicluna għal divesi drabi qal li jaf xejn bil-Memorandum of Understanding ma jaf xejn u lanqas li l-eks Ministru Chris Cardona kien qed jinnegozja ma’ xi ħadd fuq dan id-deal jew li dan kien ġie diskuss fil-kabinett.
L-eks Ministru tal-Finanzi qal ukoll li Projects Malta ma kinitx taqa’ taħt ir-remit tiegħu imma taħt Konrad Mizzi. Qal ukoll li l-Malta Eneterprise li l-Gvern ma kienx jindaħlilha kienet ukoll taħt il-Ministeru tal-Ekonomija, li dak iż-żmien kienet taħt il-Ministru Cardona.
Huwa qal li tul il-proċess tal-proġett tul il-minuti tal-kabinett li ħafna mill-iżviluppi fuq dan kienu jingħaddu biss xi kummenti. Hu qal li l-kabinett ġie mgħarraf meta l-bidder kien magħruf u li kien hemm diskussjonijiet fil-kabinett fuq il-Bord ta’ Appell.
Kienu jkunu nfurmati biss fuq dan il-proġett taż żewġ biljun ewro. Qal li ma kien hemm l-ebda regolamenti, u hu daħħal xi regolamenti fuq il-public procurement. Kienet ir-responsabbilità ta’ in imexxi dawn l-affarijet.
Qal li f’Marzu tal-2016 il-Ministeru ta’ Konrad Mizzi nfurmaw lilu u lis-Segretarju Permanenti kienu kellmuhom. Qal li kienu tawh x’jifhem li dan se jkun jiswa’ dak li se jkun qed iħallas il-Gvern għall-konċessjoni.
Qal li finalment meta tneħħi n-net payments huwa dak li għadda fil-Parlament. Apparti s-services agreement sar kuntratt ta’ ċens, fl-isptarijiet San Luqa, Karin Grech u l-Isptar Ġenerali ta’ Għawdex, qal li ma raha l-ebda paper dwar dan
L-450 sodda għat-turiżmu f’Għawdex Scicluna ma kienx il-kompitu ta’ Scicluna
Dwar l-450 sodda għat-turiżmu ta’ Għawdex għadu ma sarx qal l-Avukat Edward Debono u li dwar il-propjetà kellhom ilestu sal-2018, iżda għaddew sentejn u għadu ma sar xejn. L-Istat għamel xi ħaġa?, staqsa Debono.
Edward Scicluna qal li l-Ministeru tal-Finanzi dan mhuwiex il-kompitu tiegħu imma kompitu tal-Ministeru tas-Saħħa. “Dejjem kien hemm is-suġġerimenti li nagħtuilhom u nagħtuhom in-nifs”. Konċessjoni emfitewtika hija ta’ 30 sena, allura l-Gvern ma setax neħħa t-tapit? staqsa Debono.
Dwar jekk in-nifs għadux għaddej Scicluna qal li meta daħlu l-Amerikana l-Gvern emmen li issa l-affarijiet kienu se jimxu. Mistoqsi li għaddew sentejn oħra u ma sarx xejn.
F’dawn iċ-ċirksosanzi kollha qal li bħala Ministeru tal-Finanzi jaraw li s-somma hija ġustifikabbli, imma l-Ministeru tas-Saħħa li jara li l-ftehim isir. Meta Konrad Mizzi jiffirma 100 miljun f’dan il-każ il-Ministru tal-Finanzi m’għandux ikun jaf dwar dan kollu, qal li jaqbel u vera li ma kienx jaf.
Qal li kien talab għal ftehim u talab lil Konrad Mizzi għad-dokumenti. Dan fuq il-ftehim kien qed jalludi. Ried ikun jaf fuq il-budget dwar it-tliet ftehim u l-emfitewsi li ma kienux ġew f’idejh.
Qal li t-talba kien għamilha 12 ta’ Lulju 2016 u li l-għada qallu li kien se jgħaddimhomlu fuq ftehim li sar f’Novembru 2015. Debono qal li Konrad Mizzi iffirma side letter li l-Gvern iħallas xorta l-100 miljun u li lanqas Edward Scicluna m’għandu tali ittra.
L-eks CEO ta’ Project Malta ma kienx jaf bl-MoU ma’ Vitals
Wara xehed Adrian Said, li serva bħala CEO ta’ Projects Malta sal-2015. Said qal li ma kienx jaf bl-MoU tal-2014 ma’ Vitals u sar jaf biss bin-negozjati permezz ta’ sorsi pubbliċi.
Huwa staqsa jekk kienx sorpriż meta sar jaf dwarhom. “Iva,” huwa jwieġeb. Projects Malta ma kinitx involuta fl-abbozzar tal-RFP, huwa tenna, li laħaq Projects Malta meta kollox kien lest.
“Aaron Mifsud Bonnici qalli li kollox kien beda qabel ma beda Projects Malta,”. Said fil-fatt qara email minn Mifsud Bonnici, datata 30 ta ’Mejju, 2015, għal dak il-għan.
Said qal li Projects Malta ġiet appuntata biex tippubblika l-RFP, u dwar dan l-avukat Edward Debono staqsa jekk l-aġenzija ntużatx biex tagħti lill-pjanijiet xi ftit ta’ rispett. Said qal li Projects Malta ħallset konsulenti legali biex jaħdmu fuq l-RFP, peress li ma kellhiex l-ispeċjalizzazzjoni meħtieġa ‘in-house’.
Project Malta ma kellha l-ebda vuċi fil-kriterji ta’ evalwazzjoni
Said qal li l-membri kollha tal-kumitat ta’ evalwazzjoni ġew magħżula mill-Ministeru ta’ Konrad Mizzi u r-rapport ta’ evalwazzjoni mar direttament għand il-Ministru.
L-għażla ma saritx minn Projects Malta, huwa qal, u l-aġenzija qatt ma qalet lill-kumitat ta’ evalwazzjoni fuq xhiex għandha tiffoka jew tinjora. Il-kumitat irrapporta lit-tim tan-negozjati.
Ix-xhud huwa mistoqsi dwar l-involviment ta’ Projects Malta wara l-istadju tan-negozjati u l-evalwazzjoni. Huwa saħaq li ma kienx għadu mal-aġenzija f’dak l-istadju u kien ħa over William Wait.
Adrian Delia ma kienx kuntent bl-iskużi ta’ min kellu jixhed fil-Qorti u ma tfaċċax. “Il-Qorti ddedikat tliet sigħat għas-seduta llum, l-avukati huma kollha hawn … in-nies mhumiex annimali!” qal l-eks Kap tal-PN.
Delia jfakkar ukoll fid-diffikultà ta’ Konrad Mizzi biex is-sena l-oħra jidher quddiem il-Qorti. Fis-26 ta’ Novembru 2019, hekk kif il-pajjiż għaddej minn taqlib politiku, Mizzi kien ġera lejn il-Qorti minn Kastilja biex jevita disprezz mill-Qorti. Huwa kien spiċċa biex irriżenja minn Ministru aktar tard dakinhar stess. Il-kawża se tkompli fit-18 ta’ Jannar li ġej f’nofsinhar bix-xhieda ta’ Joseph Muscat u Konrad Mizzi.
