Il-European Medicines Agency (EMA) qalet li mexxiet ‘il quddiem — b’aktar minn ġimgħa — laqgħa li tiddeċiedi l-awtorizzazzjoni tal-vaċċin tal-Pfizer-BioNTech.
Dan ifisser li l-laqgħa se ssir fil-21 ta’ Diċembru, b’din il-bidla — mid-data preċedenti tad-29 ta’ Diċembru — qed issir wara pressjoni mill-Istati Ewropej, fosthom il-Ġermanja, li huma ddisprati għal vaċċin fi żmien meta żiedu sew il-każi tal-coronavirus fil-kontinent.
L-aġenzija bażata f’Amsterdam qalet li rċeviet ‘data addizzjonali’ mill-kumpanija Pfizer li kien talab il-kumitat tal-EMA li jevalwa l-mediċini għall-konsum tan-nies.
Intant, l-EMA, permezz ta’ stqarrija qalet li l-laqgħa eċċezzjonali tal-kumitat issa hi skedata għal qabel il-Milied u li se jsir minn kollox biex titwitta t-triq lejn it-tqassim mill-aktar fis tal-vaċċin.
Il-Kap tal-Kummissjoni Ewropea, Ursula von der Leyen, laqgħet l-aħbar u qalet li t-tilqim bil-vaċċin x’aktarx li jibda qabel l-aħħar tas-sena.
