Il-Maġistrat Rachel Montebello tat id-deċiżjoni tagħha għat-talba li saret mill-avukati tal-imprenditur Yorgen Fenech biex tiġi ppreżentata aktar evidenza quddiem il-Qorti – fosthom, il-famużi recordings u data oħra.
Fid-Digriet tagħha, il-Maġistrat ikkundannat it-tattika tal-avukati ta’ Yorgen Fenech intenzjonata biex tikontrolla x-xhieda u l-evidenza li ippreżenta il-middleman Melvin Theuma.
Il-Qorti qalet b’mod ċar li r-recordings ta’ Melvin Theuma mitluba mill-imputat mhumiex xhieda u provi li jistgħu jinġiebu, tal-anqas f’dan l-istadju tal-proċeduri. Theuma kien ingħata Maħfra Presidenzjali s-sena li għaddiet.
F’sessjoni tal-Qorti li damet kważi sagħtejn, il-Qort mill-banda l-oħra ordnat lill-Prosekuzzjoni biex tiżvela informazzjoni lill-avukati ta ’Yorgen Fenech dwar erba’ telefonati partikolari li saru qabel l-arrest ta’ Fenech.
Il-Pulizija kienet argumentat li t-telefonati kienu jikkonċernaw lill-middleman Melvin Theuma u ma kinux rilevanti għal Fenech. Ordnat ukoll disprezz kontra ġurnalisti li kitbu artikli li setgħu kellhom effett fuq il-preżunzjoni tal-innoċenza ta’ Fenech.
Il-Qorti semgħet ukoll żewġ rappreżentanti mill-kumpaniji tat-telekomunikazzjonijiet GO u Melita jikkonfermaw li numru tat-telefon partikolari rċieva żewġ telefonati minn numru barrani fit-23 ta ’Awwissu u fit-18 ta’ Novembru 2020.
L-ewwel telefonata ma ġietx imwieġba waqt li t-tieni damet ftit sekondi. Il-Qorti sadanittant irrifjutat talba tad-difiża biex jissejjaħ rappreżentant tas-Servizz tas-Sigurtà ta’ Malta biex jixhed dwar sorveljanza li wettqu dwar il-każ.
Sadanittant il-Qorti qalet lill-Avukati tad-Difiża biex jirranġaw nuqqas ta’ qbil dwar liema notamenti l-Pulizija għandhom jippreżentaw fil-każ, f’konformità ma’ digriet preċedneti tal-Qorti li jirrikjedi li l-Prosekuturi jiżvelaw informazzjoni rilevanti għad-difiża tal-akkużat.
Bħas-seduti l-oħra kien hemm is-solitu batti-bekki bejn il-Prosekuzzjoni u d-difiża fuq il-provi. Il-Qorti kif għamlet f’seduti oħra qalet li l-ġurnalisti għandhom joqogħdu attenti dwar il-mod kif jiġi rrapurtat il-każ u biex jibbażaw ir-rapporti tagħhom fuq il-fatti.
Yorgen Fenech ta’ 39 sena li kien joqgħod Portomaso, San Ġiljan qed jiġi mixli li fis-16 ta’ Ottubru 2017 u fix-xhur u s-snin ta’ qabel din id-data, organizza jew iffinanzja għaqda bil-ħsieb li jwettqu reati kriminali.
Ukoll li pparteċipa b’mod attiv fl-attivitajiet kriminali meta kien jaf l-għan jew l-attività b’mod ġenerali tal-għaqda stabbilità. Li rrenda ruħu kompliċi ma’ terzi persuni li dolożament bil-ħsieb li joqtlu persuna, cioe lil Daphne Caruana Galizia, jew li jqiegħed l-ħajja tagħha f’periklu ċar, ikkaġunalha l-mewt.
Qed jiġi akkużat ukoll li f’Malta assoċja ruħu ma’ xi persuna jew persuni f’Malta jew barra minn Malta bil-għan li jagħmel delit. Akkuża oħra tgħid li rrenda ruħu kompliċi ma’ terzi fejn dolożament, b’sustanza splussiva wettqu splużjoni li kkaġunat il-mewt ta’ Daphne Caruana Galizia jew li setgħet tqiegħed f’periklu l-ħajja ta’ ħaddieħor jew tagħmel ħsara gravi lil ħwejjeġ ħaddieħor.
Il-Maġistrat Rachel Montebello qed tippresedi l-każ. Il-Prosekuzzjoni qed titmexxa mis-Supretendent Keith Arnaud u l-Ispettur Kurt Zahra. Minn naħa tal-Avukat Ġenerali qegħdin jidhru d-Deputat Avukat Ġenerali Philip Galea Farrugia u l-Avukat Nadia Attard.
L-Avukati Jason Azzopardi u Therese Comodini Cachia qed jidhru f’isem il-familja. Intant, l-avukati Marion Camilleri, Gianluca Caruana Curran u Charles Mercieca qed jidhru f’isem Yorgen Fenech. Il-kumpilazzjoni mistennija tkompli fit-2 ta’ Frar fl-10:00 am.
