Daqs seba’ grawnds tal-futbol f’raba’ se jintilef mill-inħawi ta’ bejn l-Imġarr u ż-Żebbiegħ. Filwaqt li kull żvilupp jista’ jkollu raġuni valida, daqstant ieħor jeħtieġ li f’pajjiżna nibdew nagħmlu l-għażliet tagħna dwar jekk hux se nibqgħu naċċettaw aktar raġunijiet validi bl-iskuża tal-iżvilupp filwaqt li nitilfu aktar raba’.
Il-Partit Nazzjonalista jiġbed l-attenzjoni li r-raba’ li jintilef illum huwa fost l-aħħar raba’ li baqa’ li jista’ jinħadem mill-bdiewa tagħna. Il-PN jiġbed l-attenzjoni tal-awtoritajiet konċernati li joħorġu gwida responsabbli aktar lejn il-ħarsien tar-raba’ f’pajjiżna.
Fi stqarrija, il-Kelliem tal-Oppożizzjoni għat-Tisħiħ tal-Agrikoltura u s-Sajd, Delizzji, Self Employed u l-Koperattivi Edwin Vassallo saħaq li l-Partit Nazzjonalista jemmen li ma nistgħux nibqgħu nitilfu aktar raba’ f’mument fejn ukoll in-numru tal-bdiewa full time qed jonqos. Il-PN qed iżomm kuntatt ma’ dawk effetwati b’din it-talba ta’ żvilupp fl-inħawi msemmija u jibqa’ jitlob r-responsabbilta’ favur il-ħarsien tar-raba’.
