Żagħżugħ ta’ 21 sena minn Ħal Qormi ġie mmultat €50,000 u ngħata sentenza ta’ ħabs sospiża wara li ammetta akkużi ta’ ‘match fixing’ fis-sens li kien jirranġa partiti relatati mat-tim tal-futbol ta’ Attard.
Rudgear Scerri tressaq quddiem il-Maġistrat Charmaine Galea akkużat b’involviment fil-manipulazzjoni ta’ avveniment sportiv, li naqas milli jgħaddi informazzjoni dwar din il-manipulazzjoni lill-Kummissarju tal-Pulizija, u li kien jinvolvi ruħu f’imħatri mingħajr il-liċenzja meħtieġa.
L-Ispetturi tal-Pulizija George Frendo u Wayne Rodney Borg qalu lill-Maġistrat Galea li Scerri kien ġie arrestat wara li l-Pulizija kienet qed taġixxi fuq tip off, u li kienet għamlet rejd fid-dar li kien qed jaqsam mat-tfajla tiegħu.
Saru tfittxijiet fid-dar tiegħu u nstabu “bejn € 20,000 u €30,000” fi flus kontanti, ingħad lill-Qorti. Diversi apparat elettroniku ġew ukoll maqbuda u kienu qed jiġu eżaminati. Qed jiġu investigati wkoll numru ta’ kompliċi suspettati, qalu l-Ispetturi.
Scerri, li joqgħod Ħal Qormi, ammetta l-akkużi bil-Qorti twissieh li jista’ jiffaċċja massimu ta’ ħames snin ħabs flimkien ma ’multa ta’ €500,000 u ngħata żmien biex jerġa’ jikkunsidra l-ammissjoni tiegħu. Scerri iżda kkonferma l-ħtija tiegħu, waqt li kien assisti mill-avukati tiegħu Lennox Vella u William Cuschieri.
Il-Qorti, meta kkunsidrat l-ammissjoni bikrija tiegħu u l-kondotta nadifa tiegħu, minn naħa u min-naħa l-oħra qalet li delitti serji bħal dawn idgħajfu l-kompetittività sportiva, u kkundannatu sentejn ħabs, sospiżi għal erba’ snin, flimkien ma ‘multa ta’ € 50,000, pagabbli f’pagamenti ta’ kull xahar.
