Bħal ħafna attivitajiet oħrajn, il-Karnival ta’ din is-sena se jkollu jsir b’differenza minħabba s-sitwazzjoni tal-COVID-19.
Fil-fatt, bħalissa qed isiru l-aħħar preparamenti biex jittella’ il-Karnival b’differenza, liema Karnival se jsir bejn it-12 u s-16 tax-xahar.
Matul il-jum tat-Tlieta, il-Kap tal-Partit Nazzjonalista, Bernard Grech akkumpanjat minn martu Anne Marie żar għadd ta’ mħażen biex mill-qrib, seta’ jara u japprezza l-ħidma li qed issir mid-dilettanti tal-Karnival.
“Importanti li nifhmu kemm hu neċessarju li ngħinu dawn id-dilettanti u artisti biex jegħlbu l-isfidi tagħhom,” qal il-Kap tal-PN, Bernard Grech. “Il-Partit Nazzjonalista hu kommess li jara kif jista’ jagħmel dan. Fost l-oħrajn iktar sigurtà, iktar makkinarju, u iktar investiment għaliex żgur huwa importanti li jkollhom makkinarju li ma jniġġisx ħalli waqt l-isfilati nkunu nistgħu ngawdu l-Karnival ilkoll kemm aħna, kemm it-tfal, il-familji u ż-żgħażagħ bl-aħjar mod possibli.”
L-attivitajiet tal-Karnival għal din is-sena se jkunu addattati biex wieħed xorta waħda jgawdi l-karrijiet li tant iferħu persuni ta’ kull età.
Numru ta’ karrijiet se jitqassmu f’għadd ta’ pjazzez madwar Malta u se jkun hemm ukoll għadd ta’ esebizzjonijiet fuq il-midja soċjali.
In-Nazzjon tkellem ma’ Jason Busuttil, id-Direttur Artistiku tal-Karnival fejn spjegalna li saret ħidma bla waqfien mid-dilettanti anke minkejja li din is-sena x-xogħol se jitwera b’mod differenti mis-soltu fid-dawl tal-pandemija.
“Sodisfatt ħafna bix-xogħol li għamlu għax ħriġna b’ideat ta’ installazzjonijiet u affarijiet li ħa jkunu fuq il-midja soċjali,” qal Jason Busuttil. “Saħansitra l-wirjiet tal-kostumi qiegħdin fuq il-midja soċjali u allura mhux se jkun hemm grupp ta’ nies f’post wieħed. Ovjament kienet sfida li l-parteċipanti laqgħuha, nies li huma passjonati u jaħdmu s-sena kollha tant li ħadmu biex isir karnival mistħoqq għal din is-sena.”
Il-Karnivall ta’ din is-sena qed iġib miegħu tama biex is-sena d-dieħla jittella’ wieħed mill-ikbar spettaklu ta’ Karnival li qatt ra pajjiżna.
Fatt interessanti għal din is-sena hu li r-Re tal-Karnival se jkun qed jitpoġġa rasu ‘l isfel bħala simbolu li l-agħar tal-pandemija għadda u nistgħu nerġgħu mmorru lura għal ħajjitna bħalma kienet.
“Nittama li fl-2022 ikolna l-ikbar karnival,” qal Busuttil. “Dan nista’ naċċertah minn issa għaliex l-applikazzjonijiet diġa’ nfetħu u ngħalqu filwaqt li għandna rekord ta’ parteċipanti hekk kif hemm ‘il fuq minn seba’ parteċipanti iżjed mis-snin passati. U għalhekk qed nistennew li jkolna karnival kbir u karnival kif nafu noffru aħna l-Maltin.”
Il-Karnival ta’ din is-sena sar b’kollaborazzjoni ma’ studenti Universitarji li qasmu l-ideat tagħhom għall-karrijiet.
Fost it-temi li se jkun hemm fil-Karnival ta’ din is-sena hemm l-Coronavirus u anke San Valentinu. Il-karrijiet se jinżammu fuq skala żgħira.
Ritratti: Matthew Tabone
