Mara ta’ 48 sena minn Santa Lucia inżammet taħt arrest preventiv wara li ġiet mixlija b’pusses ta’ 47 qartas kokaina f’ċirkostanzi li juru li ma kinitx għall-użu esklussiv tagħha, liema droga nstabet fir-residenza tagħha.
Sandra Schieda ġiet mixlija quddiem il-Maġistrat Natasha Galea Sciberras li nhar is-Sibt li għadda u fil-ġimgħat ta’ qabel kellha fil-pusses tagħha l-imsemmija kokaina kif ukoll qartas bid-droga kannabis, borża u bott bil-powder tal-kreatina. Hija ġiet mixlija wkoll li kkommettiet dawn ir-reati f’distanza ta’ 100 metru minn grawnd tal-futbol ta’ Santa Luċia FC.
L-Ispettur Alfredo Mangon li ressaq lil mara qal li l-Pulizija mill-Iskwadra ta’ kontra d-Droga daħlitlha nformazzjoni li kienet qed issir attività ta’ droga f’residenza Santa Luċia u hemm instabet id-droga msemmija.
L-Avukat Franco Debono staqsa lill-Ispettur Mangion biex jispjega l-aggravju tal-akkuża tad-distanza ta’ 100 metru minn skola jew post fejn jiltaqgħu ż-żgħażagħ bit-tweġiba tkun li Schieda toqgħod viċin il-grawnd.
L-Avukat Debono filwaqt li qal li l-klijenta tiegħu m’għandhiex l-akkuża ta’ traffikar u li għandha kondotta netta fid-dawl li huwa għamel talba għal libertà proviżorja kkwota digriet li kien ta l-Imħallef Aaron Bugeja fit-8 ta’ Ottubru 2020 fil-każ kontra Gilbert Busuttil.
Huwa qal ukoll li din ma marritx viċin post fejn jiltaqgħu ż-żgħażagħ iżda nzerta li d-dar tagħha tinsab fejn il-grawnd u għalhekk jekk wieħed jieħu din il-kunsiderazzjoni allura l-mara tkun qed tiġi diskriminata. Tenna li skont il-liġi din flok persuna tmur il-ħabs tista’ tmur għal trattament
Il-Prosekuzzjoni opponiet bil-qawwa kollha t-talba għal libertà proviżorja minn naħa tad-difiża minħabba li għadhom għaddejjin l-invesigazzjonijiet u li dawn għad iridju jiġu mitkellma.
L-Avukat Debono dwar dan qal li għalhekk jeżisti l-Police Bail u qal ukoll li jekk wieħed jikser xi kundizzjoni tal-libertà proviżorja jintilfu d-depożitu u l-garanzija personali u l-imputata terġa’ tiġi arrestata.
Il-Qorti qalet li minħabba l-fatt li għadhom għaddejjin l-investigazzjonijiet fuq dan il-każ, f’dan l-istadju kienet qed tiċħad it-talba iżda talbet lill-Prosekuzzjoni biex taqgħlaq l-investigazzjonijiet tal-każ malajr kemm jista’ jkun.
