Żagħżugħ ta’ 20 sena li kien ġie arrestat tliet snin ilu wara li nstabu diversi drogi ġewwa d-dar tiegħu fil-Belt Valletta, ġie kundannat 12-il sena ħaba wara li ammetta flok għadda ġuri.
Sage Gauci tressaq il-Qorti f’April tal-2018, u kien wieġeb mhux ħati għall-pussess ta’ madwar 10 kilo kannabis, kif ukoll ammont ta’ kokaina u eroina taħt ċirkostanzi li jindikaw li d-drogi ma kinux maħsuba għall-użu personali tiegħu.
Huwa ġie akkużat ukoll bi ksur tal-libertà proviżorja, mogħtija ġranet wara l-arrest tiegħu f’April 2018, taħt garanzija personali ta’ €60,000. Wara li saret il-kumpilazzjoni quddiem il-Qorti tal-Maġistrati, l-każ għadda għall-proċess quddiem il-Qorti Kriminali, l-akkużat ressaq applikazzjoni konġunta mal-Avukat Ġenerali, u rreġistra ftehim fuq il-piena f’dak li fil-liġi jissejjaħ patteġġament.
Il-Qorti Kriminali, ippreseduta mill-Imħallef Giovanni Grixti, laqgħet dik it-talba konġunta, wara li wissiet lill-akkużat dwar il-konsegwenzi legali tal-ammissjoni tiegħu u wara li tagħtu biżżejjed żmien biex jikkunsidra mill-ġdid it-talba ħatja tiegħu.
Fuq konferma mill-akkużat u f’konformità ma ‘dik it-talba konġunta, il-Qorti kkundannat liż-żgħażagħ għal 12-il sena ħabs, multa ta’ €23,000 u €5,822 oħra bħala spejjeż tal-esperti tal-Qorti.
Barra minn hekk, il-Qorti poġġiet lill-akkużat taħt ordni tat’ rattament għat-terminu massimu possibbli ta’ ħames snin, filwaqt li ordnat il-konfiska tal-flus u l-propjetà kollha tiegħu. Id-drogi maqbuda kellhom jinqerdu, sakemm l-Avukat Ġenerali ma jinformax lill-Qorti li esibiti bħal dawn kienu meħtieġa fi proċeduri separati
