Impjegat Tork fis-settur tal-Gaming ingħata kumpens wara li tkeċċa illegalment talli wettaq eżerċizzju ta’ ‘due dilligence’ fuq żewġ klijenti. It-Tribunal Industrijali sab li l-ġustifikazzjoni mogħtija mill-kumpanija għat-terminazzjoni ma kinitx skont il-liġi u r-raġel ingħata kumpens ta’ €7,000.
Baran Duman ippreżenta t-talba tiegħu quddiem it-Tribunal għall-Impjiegi u r-Relazzjonijiet Industrijali wara li min iħaddmu, Tipbet Limited, li magħha ħadem għal madwar sentejn, temm l-impjieg tiegħu f’Diċembru tal-2018.
Huwa qal lit-tribunal li beda jaħdem għall-kumpanija fil-31 ta’ Diċembru, 2016, u ġie trasferit lid-dipartiment tal-frodi u l-pagamenti 10 xhur wara. Il-kumpanija temmet l-impjieg tiegħu billi semmiet “prestazzjoni fqira tax-xogħol” u mingħajr ma tagħtu l-ebda twissija.
Permezz tal-avukat tiegħu, Robert Gauci Maistre, Duman sostna li tkeċċa illegalment, u nsista li t-terminazzjoni segwiet it-talba tiegħu għal aktar informazzjoni minn żewġ klijenti waqt li wettaq diliġenza dovuta msaħħa bħala parti mid-dmirijiet tiegħu.
Gauci Maistre argumenta li kienet il-kumpanija tal-logħob li ddikjarat li l-każijiet ġew riferuti lill-Awtorità Maltija tal-Logħob (MGA), u soġġettaha għal investigazzjoni bil-possibbiltà ta’ multi kbar jew revoka tal-liċenzja operattiva tagħhom.
Madankollu, rappreżentant tal-MGA qal lit-tribunal li l-allegati ilmenti qatt ma waslu. Barra minn hekk, Duman qatt ma rċieva twissija minn min iħaddmu.
Gauci Maistre qal li l-prestazzjoni fqira tax-xogħol kienet ukoll ir-raġuni mogħtija lil erba’ jew ħames impjegati oħra li wkoll kellhom l-impjieg tagħhom mitmum.
Huwa argumenta li għalkemm il-kumpanija ċċitat eżerċizzju ta’ ristrutturar, dan qatt ma ġie diskuss jew tressqet xi prova biex issostni dan l-argument. L-avukat ta’ Tipbet Jacques Grima argumenta li Duman għalaq il-kontijiet taż-żewġ klijenti, bi ksur tal-policy tal-kumpanija li setgħu jeskalaw f’investigazzjoni tal-MGA.
It-tribunal, ippresedut minn James Pearsall, sab li l-kumpanija ma ħadet l-ebda azzjoni dixxiplinari kontra l-impjegat tagħha qabel ma rrikorriet għat-terminazzjoni u għalhekk ma ngħatax id-dritt bażiku li jiddefendi lilu nnifsu mill-akkużi magħmula kontrih.
Barra minn hekk, il-kumpanija ma setgħetx tieħu azzjoni kontra impjegat talli wettaq ‘due dilligence’ li kienet meqjusa meħtieġa. Għalhekk sab li Tipibet kisret ir-regolamenti dwar l-impjiegi bit-tmiem ta’ l-impjieg ta’ Duman u ordnatlu jħallas lilu total ta’ €7,000 f’kumpens.
