“Meta l-Prim Ministru jistaqsi dawn id-domandi jkompli jikkonferma kemm tilef il-kontroll tal-pandemija u issa ma jafx x’se jaqbad jagħmel.”
Sostna dan fuq il-midja soċjali ta’ Facebook il-Kap tal- Partit Nazzjonalista Bernard Grech wara li l-Erbgħa filgħodu l-Prim Ministru Robert Abela staqsa kieku kien x’jagħmel differenti minnu Bernard Grech.
Il-Kap tal-PN sostna li minflok jiskuża ruħu mal-familji tal-vittmi kollha li tilfu ħajjithom b’dan il-virus qed jinħela f’din in-narrattiva partiġġjana.
Bernard Grech insista li kieku huwa kien jagħmel screening aħjar fl-ajruport malli tfaċċat it-theddida tal-varjanti l-ġodda.
Kien jara li ma tikkollassax is-sistema tal-contact tracing u kien jara li jkun hemm infurzar serju.
Huwa insista li kien jieħu l-miżuri kollha xierqa fiċ-ċirkostanzi skont it-tagħrif kollu tal-esperti tas-saħħa u f’kull qasam ieħor.
Iżda insista li żgur ma kienx jgħid li l-mewġ qiegħed fil-baħar, li ċertament ma kienx jindaħal lill-awtoritajiet tas-saħħa u jibgħat messaġġ li fis-Sajf kollox kien normali.
Bernard Grech saħaq li ma kienx jgħid darba wara l-oħra li kollox business as usual jew li se naħarbu niġru waqt li għadna nissieltu mal-pandemija.
Finalment huwa sostna li kieku kien flok Robert Abela, ma kienx ineħħi lil Kenneth Grech minn ko-ordinatur tal-Covid-19 team għax ta parir li l-iskejjel kellhom jingħalqu.
