Xhud li ismu ma jistax jissemma fuq ordni tal-Qorti qal huwa kien ġie offrut flus bil-moħbi biex jgħaddihom lill-membru tal-familja ta’ Vince Muscat biex l-istess Muscat ma jsemmiex lil Jamie Vella u Robert Agius. Ta’ dan bejniethom kienu lesti li jħallsu pagament ta’ €1,500 fix-xahar.
Dan ħareġ meta kompliet il-kumpilazzjoni tal-erba’ rġiel li qed jiffaċċjaw akkużi fuq il-qtil tal-ġurnalista Daphne Caruana Galizia u l-avukat Carmel Chircop reġgħu rritornaw fuq il-pedana tax-xhieda fil-qorti hekk kif qed tkompli l-kumpilazzjoni tal-provi kontrihom.
L-aħwa Tal-Maksar, Robert u Adrian Agius, Jamie Vella u George Degiorgio jiffaċċjaw litanija ta’ akkużi għall-allegat involviment tagħhom fiż-żewġ omiċidji separati iżda kollha qed iwieġbu mhux ħatja tal-akkużi miġjubin kontrihom.
Il-Prosekuturi qed jallegaw li Robert Agius u Jamie Vella fornew il-bomba li ntużat biex toqtol lil Caruana Galizia, bil-Qorti tkun informata li l-Pulizija għandhom ix-xhieda ta’ Vince Muscat f’dawn il-provi, li ammetta għall-qtil bħala parti minn ftehim li sar biex huwa jingħata l-maħfra fuq il-qtil ta’ Chircop u piena minima fil-qtil ta’ Daphne Caruana Galizia.
Muscat ammetta li kien involut fil-qtil ta’ Chircop fl-2015 u qal lill-investigaturi li l-aħwa Agius ordnaw flimkien miegħu,Vella u Degiorgio biex jeżegwixxu l-qtil.
Is-seduta tal-Qorti, bħal dik tat-Tlieta, qed issir fl-awla 22, li hija kbira biżżejjed biex tospita l-partijiet, gwardji armati u ġurnalisti. Jamie Vella għal darb’oħra kien liebes ilbies protettiv abjad, bħala prekawzjoni COVID-19. Vella għadu qed jirkupra mill-virus meta ġie arrestat tard ix-xahar li għadda.
Is-Supretendent Arnaud ippreżenta evidenza oħra li tinkludi dikjarazzjonijiet mogħtija minn Adrian Agius meta ġie interrogat wara l-qtil ta’ Chircop fl-2017, u oħrajn li ngħataw lil Jamie Vella u Robert Agius lill-Pulizija lura f’Diċembru 2017.
Vella u l-aħwa Agius kienu fost l-10 persuni arrestati meta l-pulizija għamlu rejd fit-tinda tal-patata fil-Marsa. Arnaud qal li Vella kien ċaħad kull involviment fil-qtil ta’ Caruana Galizia meta ġie interrogat. Dak iż-żmien kien joqgħod is-Swieqi iżda ammetta li qabel kien ilu jgħix f’Santa Venera għal xi xhur.
Fir-rigward ta’ Robert Agius, dakinhar tal-qtil, it-telefon tiegħu kien imqabbad ma’ torri fil-Bidnija. Huwa qal lill-Pulizija li kien jgħaddi minn hemm għax dak iż-żmien kien jgħix l-Imġarr.
Agius qal ukoll lill-pulizija li kien żar ir-razzett ta’ Vella biex jara xi ponijiet għal uliedu. Huwa qal lill-investigaturi r-relazzjoni tiegħu ma’ Alfred Degiorgio kienet waħda “ħi u bye”. Huwa kien iktar familjari ma’ George, iżda ddikjara li reċentement iddistanza ruħu għax “ma kinux it-tip tiegħu.
Arnaud ippreżenta wkoll ritratti u prints ta’ Google Maps tal-garaxx li l-allegati qattiela użaw biex jaħżnu l-bomba użata biex tisplodi Caruana Galizia. Il-Qorti semgħet diġa li l-garaxx kien mikri minn raġel f’isem Robert Agius.
Milqugħa talba tal-avukat ta’ Muscat biex isem xhud u ismijiet li jista’ jiżvela ma jiġux rapurtati
Meta kien se jissejjaħ x-xhud li jmiss, l-avukat ta’ Vince Muscat, Marc Sant, talab lill-qorti tipprojbixxi kull rappurtar tal-ismijiet li jisgħu jissemmew minnu u tiegħu nniffsu.
L-Avukat Alfred Abela, li jirrappreżenta lill-aħwa Agius u lil Vella, ma qabilx ma’ dan. Il-Maġistrat Caroline Farrugia Frendo qablet mal-Avukat Sant u tenniet li l-midja tista’ tirrapporta x-xhieda tar-raġel, iżda mhux ismu jew tan-nies li jsemmi.
Ir-raġel qal lill-qorti li kien f’bar fil-Marsa meta daħal “Jamie” biex ikellmu. Ir-raġel tenna li hu ma kienx jafu. Huwa staqsieh “nista ‘nitkellem miegħek dwar Vince?”
Iż-żewġt irġiel marru barra, u r-raġel staqsieh jekk kienx possibbli għal Vince li ma jsemmix “lili jew Robert”. “Aħna nagħtu lil martu € 1500 kull xahar. Aħna lesti li nagħmlu dan,.”
Ix-xhud qal lill-qariba tiegħu dwar l-offerta. Il-mara ta’ Vince rrifjutatha. Ix-xhud qal li kien kuntent b’dan kollu. Il-laqgħa seħħet bejn Settembru u Ottubru tas-sena l-oħra.
Ix-xhud qal li din il-persuna kien żagħżugħ ta’ madwar 30 sena. Ir-raġel l-ieħor, “Robert”, qatt ma avviċinah. Iżda Jamie kien ipponta lejh waqt li hu kien barra t-triq, wieqaf ħdejn karozza fuq il-bankina.
“Kemm kien twil dan ir-raġel?” jintalab jgħid ix-xhud. Huwa wieħeb madwar ħames piedi u ħames pulzieri, mhux irqiq wisq u lanqas oħxon. Xagħaru qasir, smaqtugħ crew cut u qiesu fil-kannella.
Mistoqsi x’kienet, speċifikament, il-proposta. “Għal Ċensu (Vince) biex ma nsemmuxhom, u r-raġel u sieħbu kull wieħed jagħtuh € 750 fix-xahar.
Ix-xhud qal li l-offerta kienet se ssir lill-mara ta’ Vincent, iżda probabbilment hi kienet se tirrifjutaha. Din il-persuna kellu jirritorna erbat ijiem wara għal tweġiba.
“Jamie” irritorna wara ħamest ijiem, kompla jgħid x-xhud. Huwa qallu li l-offerta ma ġietx aċċettata, u mar lura fil-bar biex jevita li jkompli jitkellem miegħu.
Ix-xhud qal li ma għarafx lir-raġel meta ġie ppreżentat mill-pulizija f’identifiaction parade flimkien ma’ oħrajn. Qal li hu ra lil dan ir-raġel darba biss u li hu mhux it-tip li jħares lejn in-nies.
Is-Superintendent Arnaud staqsa lix-xhud jekk il-maskri kinux obbligatorji dak iż-żmien fejn wieġeb li ma jafx, iżda żgur li ma kinux liebes maskri. Arnaud innota li x-xhud avviċina lill-pulizija “ħames xhur ilu”.
Il-parte civile tista’ tagħmel ri-eżami tax-xhud
Ix-xhud tenna li l-inċident tal-bar seħħ probabbilment xahrejn jew tliet xhur qabel, allura bejn wieħed u ieħor jkun li ġara madwar disa’xhur ilu. L-Avukat Jason Azzopardi staqsa lix-xhud jekk hux familjari maż-żona ta’ Triq Balbi fil-Mosta.
Din il-mistoqsija sabet oġġezzjoni mid-difiża. Hekk kif il-Qorti bdiet tisma kwistjoni proċedurali, ix-xhud intalab joħroġ mill-kamra. Il-kwistjoni kienet li l-parte civili ma tistax tagħmel ri-eżami tax-xhud.
Id-difiża argumentat li l-avukati parte civile ma jistgħux jikkontro-jeżaminaw ix-xhieda prodotti mill-prosekuzzjoni, peress li huma joqogħdu fuq l-istess naħa.
Il-Maġistrat Farrugia Frendo ikkwotat dispożizzjonijiet legali dwar il-kontro-eżamijiet. Hija tgħid li mistoqsijiet ewlenin mhumiex permessi, iżda li parte civile u l-Prosekuzzjoni jaħdmu flimkien biex isaħħu l-akkużi. L-interrogazzjoni hija permessa bil-Qorti tgħid li l-parte civile għandha kull dritt li tagħmel id-domandi.
Ix-xhud qal li jidhirlu li l-inkontru ma’ persuna li ma kienx jaf seħħ għall-ħabta tal-10.30am jew 11am u dan meta l-persuna avviċinatu l-ewwel darba. Qal li ilu jiffrekwenta dan il-bar għal madwar 50 sena.
Wara beda l-kontro-eżami tal-Avukat Alfred Abela bix-xhud jgħid li Jamie Vella kien poġġa ħdejh fil-bar u kien talbu biex joħroġ barra miegħu. Il-konverzazzjoni kienet damet bejn ħamsa u 10 minuti.
Jikkonferma li ltaqgħu darbtejn, darba meta għamillu l-offerta u t-tieni darba biex jara kif baqgħu. “Allura kont fil-bar meta din il-persuna ġie għandek u talabek titkellem u talbek biex issegwih sa barra?”, staqsa l-Avukat Abela.
Ix-xhud qal li r-raġel qagħad ħdejh, staqsa ismu u talbu biex barra ma’ barrani totali?”isegwih barra biex jitkellem, għax ġewwa kien daqsxejn storbjuż.
Mistoqsi jekk kien qed jibża’ li joħroġ barra ma barrani, x-xhud qal li kien bin-nhar, anke jekk għamel mistoqsijiet lilu nnifsi, dwar dan Abela staqsa lix-xhud jekk kienx fil-bar meta l-barrani rritorna għal tweġiba.
Ix-xhud wieġeb fl-affermattiv u qal li għarfu u marru barra u għamilha ċara li ma ridtx jitkellem hemm. Ix-xhud tenna li qalu li t-tweġiba kienet “le” u mar lura ġewwa. Jemmen li aġixxa b’mod mhux ċivilizzat, tliet minuti kollox u telaq.
L-Avukat Abela kompla bis-serje ta’ mistoqsijiet fejn qal lix-xhud li meta hu (ix-xhud) mar il-Kwartieri tal-Pulizija fejn kien hemm il-Maġistrat Inkwerenti preżenti, ma setax jagħraf lil dan ir-raġel.
“Huwa kien wieqaf quddiemek wara l-ħġieġa. Il-Maġistrat talabek biex toħroġ u terġa’ tidħol, imma int ma għarfitux”, qal l-Avukat Abela. “Imma kont ‘il bogħod, distanza ta’ bejni u l-Maġistrat,” qal ix-xhud. Abela wissa lix-xhud li huwa kien taħt ġurament u qallu li m’hemmx aktar minn ħames piedi distanza fil-kamra tal-identification parade.
Is-Supretendent Arnaud xtaq li x-xhud jiċċara xi ħaġa u dan jekk dan ir-raġel qallux f’liema kuntest Vince Muscat ma kellux isemmihom. Ix-xhud wieġeb fin-negattiv.
“Huwa qalli biex ngħid lil Vince fil-ħabs biex ma jsemmix lil Jamie jew Robert u huma jagħtu lil martu €1,500 fix-xahar.” Arnaud staqsa lix-xhud jekk jafx għalfejn Vince Muscat jinsab il-ħabs. “Dwar il-qtil ta ‘Caruana Galizia,” huwa wieġeb.
Mistoqsi x’aktar, ix-xhud tenna li nvoluti hemm l-aħwa Degiorgio u dak ta’ Tumas li qal lanqas jimpurtah x’jismu. Arnaud talab lix-xhud biex jiftakar jekk kienx hemm xi ġrajja partikolari madwar iż-żmien li “Jamie” mar il-bar.
Ix-xhud qal li le u sostna li kien is-Sibt filgħodu u kien liebes flokk u kien jum sħun. Il-Maġistrat qalet li x-xhud l-ewwel huwa qal li l-inċident kien ħames xhur ilu, u mbagħad 10. Ix-xhud wieġeb li ma jaħsibx li kien 10 xhur ilu, u li iżda ma jżommx record u ma joqgħodx jgħodd il-ġranet.
Kera garaxx f’isem Robert Agius
Wara xehed John Bugeja li qal li kien jikri garaxx f’Ħal Qormi f’isem Robert Agius tal-Maksar. Bugeja qal li llum ma jaħdimx iżda qabel kien jintuża biex jimporta deterġenti mill-Italja.
Bugeja huwa mistoqsi minn Arnaud jekk għandux propjetà. Huwa tenna li jikri proprjetà mingħand tal- “Maksar”, “Robert Maksar. Robert Agius, qal ix-xhud.
Bugela kien mitlub jidentifikah … u wara xi ftit tal-problemi, l-Maġistrat talbet lil kulħadd biex ibaxxi l-maskri, biex jiffaċilita l-identifikazzjoni. Wara xi ftit tal-konfużjoni, ix-xhud għaraf lil Robert Agius.
Qal li hu u Agius iltaqgħu fuq il-catamaran. Dwar deterġenti tenna li kien iġibhom minn Pozzallo u li Agius kien qallu wkoll madwar 10 snin ilu biex jikri tliet garaxxijiet l kienu propjetà ta’ Ta’ Maksar fil-Magħtab.
Hu kien kera il-garaxxijiet għal madwar sena u nofs. Tenna li wara kien iddikjara li jinsab fallut. Spjega li s-sieħeb tiegħu fin-negozju kien qed jisraq mingħandu u xi ħadd kien seraq numru ra’ prodotti mill-garaxx fil-Magħtab.
Qal ukoll li mingħand it-Taljan kien jixtri bid-dejn. Eventwalment in-negozjant Taljan kien ħa l-prodotti kollha lura u ħallih b’xejn peress li kien jieħu mingħandu b’self. Qal li kien anke kellu jagħti flus lil Ta’ Maksar għal żewġ konsenji ta’ prodotti.
Saħaq li kienu żewġ trailors li jiswew €96,000 li għadu jħallas sa llum iżda li ftit għad baqalu jagħti minnhom. Mistoqsi kif iħallas lura lil Agius, Buġeja qal li dan jiddependi mis-sitwazzjoni finanzjarja tiegħu iżda dejjem ħallsu bi flus kontanti.
Arnaud wera ritratt lix-xhud li qallu li hemm il-Mosta u li dan huwa garaxx li kien kera mingħand Giovann tas-Soap and Sponge li kien inqatel b’karozza bomba f’Buġibba.
Kien kera l-garaxx għal €700 fis-sena għall-perjodu sentejn bil-flus joħroġhom Robert Agius għax propjament għalih kien mikri dan il-garaxx li jesa’ karozza waħda. Robert ried li jinkera fuq ismi, u hekk kien ġara.
Fil-fatt kien ta ċ-ċwievet lil Robert Agius u ma rahx iżjed il-garaxx. Metra għaddew is-sentejn l-istess Robert tah iċ-ċwievet u r-remote control u tahom lis-sid.
Wara brejk qasir il-Maġistrat Farrugia Frendo f’nota li qrat qalet li “Il-qorti ġiet mgħarrfa mid-deputat reġistratur tagħha li waqt li din is-seduta kienet sospiża, Jason Azzopardi għarrafha, wara li talab kopja tad-digriet dwar id-dritt għal kontro-eżami mill-parte civile, li jekk tikkwota din in-nota fil- ħames sena f’eżami, kien se jwaħħalha.
Ir-reġistratur hija student tal-liġi bil-Qorti qalet li tiddeplora din l-azzjoni ta’ Jason Azzopardi. Din in-nota qalet il-Maġistrat se tinġieb għall-attenzjoni tal-Kummissjoni għall-Amministrazzjoni tal-Ġustizzja.
Kien innotat qalet il-Qorti li din l-imġieba ta’ Azzopardi kompliet wara li l-Qorti wissietu biex iġib ruħu b’mod xieraq. Azzopardi jagħti lectures dwar il-prinċipji tal-liġi kriminali fl-Università ta’ Malta.
Fl-aħħar tas-seduta l-Avukat Jason Azzopardi ippreżenta nota fejn talab skuża għall-kummenti għal li għadda qabel u spjega li huwa kien biss qed jiċċajta mar-reġistratur fejn spjega li tant huwa l-każ ma jeżaminax karti tal-istudenti tal-ħames sena.
Konfiskati diversi oġġetti nkluż eroina mid-dar ta’ Adrian Agius
Wara xehed l-Ispettur Shawn Pawney li kien involut fl-arrest ta’ Adrian Agius ix-xahar li għadda. Qal li huwa kien fittex karozzi u d-dar ta’ Agius fil-Mellieħa, u kkonfiska żewġ laptops, telefowns ċellulari, ħames SIM starter packs u tliet top-up cards, fost affarijiet oħra.
Il-Pulizija kkonfiskaw wkoll safe li sabu fid-dar u li dan fetħuħ lbieraħ, iżda ma sabu xejn ġewwa. Espert tad-droga kkonferma li 350g ta’ sustanza suspettuża maqbuda waqt l-arrest hija eroina, huwa temm jgħid.
L-Isettur Pawney qal ukoll kien involut ukoll fl-interrogazzjoni ta’ Agius u George Degiorgio. Huwa qal li l-ebda wieħed minnhom ma wieġeb għall-mistoqsijiet u għamlu użu mid-dritt tagħhom li jibqgħu siekta.
Diversi oġġetti misjuba fil-karozza ta’ Adrian Agius
Wara xehed Surġent tal-Pulizija li ta rendikont tal-arrest ta’ Adrian Agius. Qalulu li kien dwar il-qtil ta’ Carmel Chircop. Tenna li kien ingħata struzzjonijiet mill-Ispettur Pawney sabiex iwettaq tfittxija flimkien ma’ Pulizija oħra.
L-affarijiet li nġabru mill-karozza ta’ Agius tpoġġew f’boroż tal-plastik u ġew issiġillati. Huwa qal ukoll li meta ġiet imfittxija l-vettura, huwa kien innota fuq is-sit tal-passiġġier ta’ quddiem, borża sewda li kien fiha telefon Samsung u ammont ta’ flus kontanti , €3,000 (60x €50 biljetti marbutin bi lastiku).
Kien hemm borża oħra, li kien fiha €460 f’kartiera. Diversi cards ta’ Adrian Agius, inkluża viża Natwest, instabu hemm ukoll. Fil-kompartiment tal-‘arms rest; instabet sim card tal-Vodafone.
Kien hemm ukoll kompartiment taħt is-sit tas-sewwieq li jingħalaq permezz ta’ bieba żgħir. Ix-xhud tenna li fiha nstabet borża tal-plastik trasparenti kbira mgeżwra f’tejp li fiha sustanza kannella. Fil-karozza nstabet ukoll kaxxa b’seba’ DVDs.
Fit-tfittxija sabu anke dokument ta’ Eġizzjan u li xi nies kienu qalu lill-Pulizija li raw lil Adrian Agius jarmi żewġ pakketti. Il-karozza kienet ġiet ikkonfiskata mill-Pulizija.
Meta Agius kien mistoqsi dwar is-safe li nstab fil-kamra tas-sodda kien qal li ma kellux iċ-ċavetta għaliex kien tas-sid tal-propjetà. “Tagħmluli pjaċir jekk taqbduh u toħorġuh” Agius qal lill-Pulizija dwar is-safe.
Ix-xhud kompla jgħid li Adrian Agius jsofri minn pressjoni għolja u kien irrifjuta assistenza medika. Kien iżda ittieħed f’ċentru tas-saħħa u wara lura l-Kwartieri Ġenerali tal-Pulizija.
Wara tela’ fuq il-pedana tax-xhieda l-Ispettur Shawn Pawney, li jifforma parti mill-iskwadra tal-omiċidji tal-Pulizija, u huwa wieħed mill-Prosekuturi f’dan il-każ.
Huwa qal lill-Qorti li Pawney kien involut f’investigazzjonijiet li wasslu għall-arrest tal-aħwa Agius u ta’ Jamie Vella u kkoordina l-operazzjoni mill-Kwartieri Ġenerali tal-Pulizija.
Pawney kompla li Robert Agius u tmien irġiel li jixbħuh ġew inklużi f’parata ta’ identifikazzjoni tal-Pulizija. Kien hemm preżenti wkoll il-Maġistrat Neville Camilleri.
Kompla li fl-24 ta’ Frar hu kien preżenti għall-interrogatorju ta’ Robert Agius. L-IPawney kien preżenti wkoll għall-interrogatorju ta’ Jamie Vella bix-xhud jikkonferma li t-tnejn li huma ma wieġbu għal ebda domanda.
L-Avukat Alfred Abela staqsa lill-Ispettur dwar meta xhud intalab jidentifika lil Robert Agius. Qal li d-distanza bejn min irid jagħraf lill-suspettat kienet ta’ ftit metri u li s-suspettat ma setax jara min qed iħares lejh.
Separazzjoni tal-ġudizzju
Il-Qorti qalet li rċeviet tweġiba għal talba minn George Degiorgio biex tissepara l-każ tiegħu minn dak tal-akkużati l-oħra. L-avukat tal-Avukat Ġenerali qal li dan huwa fid-diskrezzjoni tal-A.Ġ. u t-talba għandha tiġi minnu.
Huwa argumenta li ma tagħmilx differenza għal George Degiorgio dwar jekk il-każijiet humiex separati jew le. L-Avukat William Cuschieri, li qed jidher għal George Degiorgio, qal li n-naħa l-oħra mhix qed tifhem il-punt tat-talba tal-klijent tiegħu. “Hawnhekk, l-akkużi kollha mhumiex ġejjin mill-istess fatt,” tenna l-avukat.
Cuschieri qal li Degiorgio diġà għadda mill-proċess ġudizzjarju dwar il-qtil ta’ Caruana Galizia u għada l-Ħamis, “għandna seduta quddiem il-Maġistrat Claire Stafrace Zammit biex nisimgħu lill-akkużat li kien ammetta ”.
Cuschieri qal li jkun hemm pubbliċità preġudizzjarja bla bżonn ta’ qabel il-proċess u jsofri dewmien – il-kumpilazzjoni l-oħra tal-provi ħadet tliet snin. “L-akkużi qatt ma kellhom jinħarġu b’dan il-mod fl-ewwel lok,” huwa saħaq.
Il-familja Caruana Galizia hija rappreżentata mill-Avukati Jason Azzopardi u Therese Comodini Cachia. Il-familja Chircop hija rrappreżentata minn Vincent Galea.
L-aħwa Agius u Jamie Vella huma rrappreżentati mill-Avukati Alfred Abela u Rene Darmanin u George Degiorgio huwa rrappreżentat mill-Avukat William Chetcuti. Is-Supretendent Keith Arnaud qed imexxi l-prosekuzzjoni flimkien mal-Avukat George Camilleri mill-Uffiċċju tal-Avukat Ġenerali. Il-kumpilazzjoni se tkompli fit-23 u 24 ta’ Marzu li ġej fit-8.30am.
