L-Istati Uniti kundannat l-abbuż taċ-Ċina fil-konfront tal-minoranzi etniċi u reliġjużi fl-artijiet tagħha. Il-messaġġ ta’ kundanna kien enfasizzat waqt diskors lill-Kunsill tad-Drittijiet Umani tan-Nazzjonijiet Uniti u fejn issemmew ‘reati kontra l-umanità u ġenoċidju’ fil-konfront tal-membri tal-komunità (minoranza etnika) fir-reġjun ta’ Xinjiang. Parti mill-kundanna kienet riservata wkoll għar-restrizzjonijiet severi li ċ-Ċina qed timponi għal Tibet.
Mark Cassayre, iċ-charge d’affaires Amerikan, waqt id-diskors lill-Kunsill ikkundanna anki lill-awtoritajiet ta’ Hong Kong dwar l-arrest tal-attivisti demokratiċi ‘li kienu qed jeżerċitaw id-drittijiet tagħhom bħala persuni ħielsa’. Dan fost l-insistenza biex dawn l-attivisti jinħelsu ‘minnufih’.
Cassayre uża dan id-diskors biex (anki) iħeġġeġ lir-Russja biex teħles lill-Kap tal-Oppożizzjoni – u kritiku ewlieni tal-Kremlin – Alexei Navalny, flimkien ma’ mijiet ta’ nies oħra ‘li qed jinżammu taħt arrest illegalment f’dak il-pajjiż’.
Din mhix l-ewwel darba li l-Istati Uniti ħarġet tikkundanna liċ-Ċina dwar ġenoċidju u ripressjoni tal-Musulmani Uighur f’Xinjiang.
Dan kien l-aktar evidenti meta l-Istati Uniti kienet immexxija mill-eks President Donald Trump u meta l-Gvern Amerikan kien jirreferi għad-‘dokumentazzjoni tal-avvenimenti’ li urew li l-awtoritajiet Ċiniżi ilhom mill-2017 jeskalaw il-kampanja ta’ ripressjoni kontra l-Uighur u l-membri tal-minoranzi l-oħra fiċ-Ċina, inklużi l-komunitajiet tal-Każaki etniċi.
Fl-istess ħin – sa minn qabel l-elezzjoni tal-President Amerikan Joe Biden — l-uffiċjali nkarigati mill-kampanja tal-Partit Demokratiku għall-Presidenza kienu diġà dikjaraw ‘li l-ġenoċidju tal-Uighur laħaq qabad spinta sew f’Xinjiang.’
