“Binti jixirqilha li tgħix… se nagħmel minn kollox biex inżomm lil binti ħajja”
Appell imqanal minn Edwin Vella… missier tfajla ta’ 26 sena li tbati mill-kundizzjoni tas-cystic fibrosis. Huwa qed jitlob lill-Gvern biex bintu tkun provduta b’mediċina approvata mill-UE li tista’ ssalvalha ħajjitha.
Il-professur li jieħu ħsieb lil Mandy kien ċar kristall fi kliemu… “Jekk mhux se tiehu dawn il-pilloli, it-tifla se tmut”
Ftit tal-jiem ilu Mandy Vella kellha tiddaħħal għall-kura fl-Isptar Mater Dei wara infezzjoni li affettwatilha l-pulmun.
Missierha jgħid li għandha bżonn b’mod urġenti trattament ta’ €18,000 fix-xahar imsejjaħ Trikafta, li ġie approvat mill-UE f’Awwissu tas-sena li għaddiet iżda bħalissa mhux disponibbli f’Malta.
Missier Mandy jgħidilna li ilu għaddej minn martirju għal dawn l-aħħar 25 sena u għalhekk jispera li l-għajta tiegħu tinstema’.
Huwa qal li filwaqt li jifhem li l-ispiża kienet waħda għolja, speċjalment waqt li ninsabu għaddejjin minn pandemija, din il-mediċina hija l-unika terapija disponibbli biex tgħin lil bintu.
Edwin Vella jinsab imweġġa’ ferm hekk kif jidher li ħadd inkluż il-Gvern mhu qed jagħti każ il-karba tiegħu.
Is-cystic fibrosis hija marda ġenetika li taffettwa l-frixa u tattakka wkoll il-pulmun. Dan jista’ jwassal ukoll għal problemi respiratorji kif ukoll kumplikazzjonijiet oħra bħal infezzjonijiet u dijabete.
