Il-European Medicines Agency (EMA) iddikjarat li l-vaċċin tal-Astra-Zeneca għal kontra l-Covid-19 hu sigur u effettiv.
Sadanittant, l-aġenzija tat parir biex in-nies jimxu dejjem mal-istruzzjonijiet mediċi waqt li jikkonsultaw mat-tobba tagħhom. L-EMA intant se tkompli tistudja r-rabtiet possibbli bejn każi rari ferm ta’ trombożi u l-vaċċin.
L-EMA — bħala r-regolatur tal-mediċini tal-Unjoni Ewropea — investigat l-effetti tal-vaċċin tal-Astra-Zeneca wara li l-Ġermanja u pajjiżi oħra tal-Unjoni sospendew l-użu ta’ dan il-vaċċin huma u jistennew il-verdett ta’ din l-aġenzija.
L-EMA mexxiet laqgħa speċjali biex tindaga dwar il-konnessjoni bejn xi każi tat-trombożi li nstabu fil-persuni li kienu tlaqqmu bil-vaċċin tal-AstraZeneca. Sallum, mal-5 miljuni ngħataw it-tilqima tal-Astra-Zeneca madwar l-Unjoni Ewropea u l-każi tat-trombożi kienu rari għall-aħħar.
Qabel id-dikjarazzjoni tal-EMA, ir-regolatur tal-mediċini fir-Renju Unit, ma kien sab l-ebda rabta bejn il-vaċċin tal-AstraZeneca u t-trombożi ( inċidenza ta’ blood clots fil-ġisem).
Intant, l-Organizzazzjoni Dinjija tas-Saħħa (WHO) għadha kemm sejħet biex il-pajjiżi jkomplu jużaw il-vaċċin. Dan meta l-Ewropa tinsab għaddejja bi ġlieda kbira biex trażżan l-effetti qattiela tal-Covid-19 u l-varjanti tiegħu.
