Il-Kanċillier tal-Ġermanja, Angela Merkel, qed taħseb biex testendi l-lockdown attwali f’pajjiżha għal April bis-sitwazzjoni lokali għadha inkwetanti ħafna.
Id-deċiżjoni potenzjali – li tidher relatata għar-rata għolja ta’ infezzjonijiet u l-biża’ dwar ir-riperkussjonijiet minn tielet mewġa tal-virus – għandha tkun diskussa dalwaqt mal-kapijiet tar-reġjuni tal-Ġermanja.
Fl-istess ħin, il-każi tal-coronvirus fil-Polonja żdiedu b’27 fil-mija f’perjodu ta’ ġimgħa – bi kważi 22,000 każ ġdid ikunu rappurtati fl-aħħar perjodu ta’ 24 siegħa.
Min-naħa tagħha, it-tabiba Mary Ramsay, tal-Public Health England (PHE), qalet li r-restrizzjonijiet relatati mal-pandemija — fosthom il-ħarsien tad-distanzi soċjali u l-ilbies tal-maskri – kapaċi jdumu għal ftit snin oħra.
Ramsey, li tmexxi s-settur tat-tilqim mal-PHE, qalet li n-nies, issa, draw jgħixu bir-restrizzjonijiet minimi bħall-ilbies tal-maskri u għaldaqstant, l-ekonomija tista’ tkompli taħt dawn il-kundizzjonijiet li jeħtieġu jkunu mħarsa sew bil-għan li ma jintilifx kontroll tas-sitwazzjoni.
