“Għalina is-settur volontarju huwa pilastru fundamentali u mportanti – qasam li hu krucjali għall-komunita’ kollha.”
Hekk iddikjara il-Kap tal-Partit Nazzjonalista Bernard Grech waqt laqgħa li kellu mall-Kunsill Malti għas-Settur Volontarju.
Bernard Grech spjega li hu jħares lejn dan il-qasam b’rispett kbir, għaliex dan is-settur iservi primarjament biex jippromovi u jiżviluppa l-idea li persuna tagħmel xogħol siewi … għax temmen bis-sħiħ f’dak li qed tagħmel, għall-ġid tal-komunità ġenerali.
Apparti dan, is-settur volontarju jappoġġa organizzazzjonijiet żgħar u medji fil-ħidma tagħhom u jipprovdi taħriġ u konsulenza għall-voluntieri u amministraturi ta’ dawn l-organizzazzjonijiet.
Il-Kap tal-Partit Nazzjonalista saħaq li hu trawwem f’dan il-qasam għax fil-passat għamel xogħol ta’ volontarjat ma’ diversi għaqdiet, fosthom mal-Community Chest Fund, kif ukoll f’diversi baned u kazini. Bernard Grech qal li meta wieħed jagħmel xogħol ta’ volontarjat u mhux għall-flus, is-sodisfazzjon ikun ikbar, għaliex tkun qed jaħdem fuq xi ħaġa li verament temmen fiha.
Il-President tal-Kunsill Malti għas-Settur Volontarju Noel Camilleri spjega d-diversi inizjattivi li saru sabiex, fiċ-ċirkostanzi preżenti minħabba l-Covid-19, li bla dubju laqtet ukoll lis-settur tal-volontarjat ukoll, ikun f’pożizzjoni li jassisti lill-għaqdiet u l-individwi li jaħdmu f’dan il-qasam.
L-avukat Camilleri spjega wkoll li bħala Kunsill mhux qed ikollhom biżejjed fondi mill-Gvern biex jippromwovu il-kampanji tagħhom.
Preżenti għal din il-laqgħa mill-Partit Nazzjonalista kien hemm il-Vici Kap tal-PN David Agius, id-deputat Ivan Bartolo, id-deputat Kevin Cutajar, u l-kandidat Nazzjonalista Ivan Bartolo.
