Ix-xogħlijiet ta’ kostruzzjoni li bdew isiru fil-passaġġ prinċipali tal-Blue Lagoon f’Kemmuna qegħdin isiru mingħajr permess maħruġ mill-Awtorità dwar l-Ambjent u r-Riżorsi… u kif fissret l-għaqda Friends of the Earth Malta, dan huwa inkwetanti.
Għall-kuntrarju tal-impressjoni mogħtija mill-Ministeru għall-Għawdex, li fi stqarrija iddikjara li kien hemm l-approvazzjoni mill-Awtorita’ tal-Ippjanar, Friends of the Earth Malta tista’ tikkonferma li l-applikazzjoni biex issir dan ix-xogħol f’Kemmuna ….li tmur lura ghall- 2018 …għadha pendenti.
L-għaqda…filwaqt li kkundannat din l-azzjoni…qalet li dawn ix-xogħlijiet se jwasslu biex jikkawzaw ħsara ambjentali kbira u ksur tal-Leġislazzjoni sussidjarja li titratta Regolamenti dwar il-protezzjoni tal-Flora, Fawna u Ambjenti Naturali.
Iżda l-Ministeru t’Għawdex ma ta l-ebda widen għal dan, u x-xogħol illegali f’Kemmuna beda jsir xorta waħda .
Skond il-Kelliem tal-Oppożizzjoni għall-Ambjent u t-Tibdil fil-Klima Robert Cutajar…. “din saret tendenża.. fejn xogħlijiet illegali qegħdin jitħallew jiġu kkumissjonati minn diversi awtoritajiet governattivi…bħalma ġara ricentament f’Had-Dingli.
Robert Cutajar fakkar li dawn ix-xogħlijiet qed isiru fuq art ODZ u f’żona sensittiva – sit ta’ Natura 2000.
Minn naħa tagħha, Friends of the Earth Malta saħqet li l-ebda Ministeru jew entita’ ma għandha tikser il-liġi sabiex tikseb aktar popolarita’ politika.
