Is-sitwazzjoni tal-imxija, ftit li xejn għenet din is-sena biex nidħlu fl-ispirtu tal-Ġimgħa Mqaddsa. Il-kamra tal-aħbarjiet ta’ Net News għamlet kuntatt mal-Professur Manwel Mifsud, lettur ewlieni tal-lingwa Maltija fl-Università ta’ Malta u wara kollox kien wieħed mill-imħuħ wara l-produzzjoni ‘Ikun li trid int’. Infatti għal dan ir-rakkont mużikali, għal din l-għanja, l-imħuħ fil-kitba kienu hu, flimkien ma’ Thérèse Caruana neè Cassar.
“Se ngħannulkom din il-ġrajja
f’erbatax-il pass qaddis,
illi mexa Kristu Sidna
bl-għuda tas-salib għażiż.”
Dawn huma l-ewwel versi ta’ din il-ġrajja, u bil-mużika mill-isbaħ li żżommok tisma’ r-rakkont tal-passjoni ta’ Ġesù Kristu. Fl-intervista ta’ ftit minuti li kellna ma’ Manwel Mifsud huwa tana l-ewwel ideat ta’ kif nibtet l-idea tal-produzzjoni.
Minn fejn nibtet l-idea?
“L-idea nibtet mill-famuża produzzjoni ‘Jesus Chris Superstar’, naqra idea minnha kellna, imma aħna ridna nagħmlu l-‘Jesus Christ Superstar’ tal-Maltin, bil-Via Sagra bħal ma nafu nagħmlu aħna l-Maltin, u wara kollox b’aktar devozzjoni”
Il-Prof. Mifsud kompla billi qalilna li riedu jkunu oriġinali. Huwa kien parti mill-għaqda Youth Travel Circle (YTC), fejn kull Ġimgħa Mqaddsa kienu jtellgħu produzzjoni ċkejkna, iżda fl-1975 ġiet ix-xewqa li jtellgħu “għanja li tirrakonta l-istorja tal-passjoni”. Huwa kompla billi qalilna li l-idea wara inbidlet għax l-għanja hija limitata fil-varjetà tal-mużika, u għalhekk qalu li aħjar jagħmlu serjè ta’ kanzunetti li s-sentiment jidher permezz tal-lirika.
“Inkitbet malajr malajr, fi ħmistax-il ġurnata lestejniha”
Kif kibret fil-popolarità?
“Ittelat fl-1975 għall-ewwel darba fis-Santwarju tal-Mellieħa, sena wara ġiet irrekordjata u orkestrata għat-televizjoni”. Huwa tenna li hija produzzjoni b’taħlita tat-tradizzjoni qadima, u fl-istess ħin ta’ xi ħaġa ġdida, u din l-idea kienet parti mis-suċċess.
“Bla ebda dubju, l-involviment tal-mibki Sammy Bartolo, li kien qed jinterpreta l-parti ta’ Kristu, għen mhux ħażin, wara din il-produzzjoni kienet saret fil-cassettes u wara anki fis-CD’s”
Huwa qalilna li t-taħlit tat-tradizzjoni u ta’ innovazzjoni, u qalilna s-sabiħ li kull sena qed tkun imfakkra. Qalilna li jieħu gost jisma’ anki l-istazzjonijiet tar-radju jdoqqu din il-produzzjoni. Manwel Mifsud qalilna wkoll li din il-produzzjoni tant kemm kibret li waslet anki biex tkun imtella’ fis-Sydney Opera House fl-Awstralja, fejn hemm ġiet imtella’ bħala teatrin, u kien hemm kant mill-kor tal-Opera House.
X’kien l-irwol tiegħek biex tittella’ din il-produzzjoni?
Meta saqsejna biex nagħmlu intervista dwar din il-produzzjoni, kulħadd qalilna bil-Prof. Manwel Mifsud, u għalhekk aħna saqsejna għaliex kulħadd irrefera għalih. Bi ftit mistħija huwa qalilna hekk:
“Jirreferu għalija, mhux għax jien speċjali, imma l-idea ġiet lili u kont nieħu ħsieb ħafna l-attivitajiet kulturali tal-YTC stess, il-biċċa l-kbira, 10 minn 15 il-track, ktibthom jiena, xi ħadd prinċipali dejjem irid ikun hemm, imma fl-istess ħin xi ħadd bħala fus, irid ikun hemm, il-fus ma jagħmilx ir-rota, ir-rota ssir bl- imgħażen u l-partijiet l-oħrajn kollha flimkien, ir-rota issa daret, u għadha qed iddur”
Huwa qalilna li ta’ kull sena qed ikun hemm produzzjoni ta’ ‘Ikun li trid int’ fiċ-ċentri tal-lokalitajiet tagħna iżda sfortuntament din is-sena minħabba l-imxija mhu ħa tiġi mtella’ mkien.
Hemm ħsieb li terġa’ tkun imtella’, ikun hemm produzzjoni ġdida?
“Ġieli nħasbet din il-ħaġa, imma konna nibżgħu li nitilfu l-vuċi ta’ Sammy Bartolo, li għalina hija xi ħaġa kbira, imma fl-istess ħin, bħal kull xogħol ieħor, bħal kull poeżija ta’ kull artist, tista’ tkun interpretata darb’oħra, u jqumu żgur vuċijiet oħra, talenti ġodda, għaliex il-futur huwa ħażin li nagħlqulu l-bieb”.
Ritratti ta’ Joseph Galea.
