79 Organizzazzjoni Volontarja jitolbu li jkunu rtirati l-Avviżi Legali

79 organizzazzjonijietqegħdin jappellaw lill-G vern biex jirtira l-Avviżi Legali li jirregolaw attivitajiet tal-Kollezzjonijiet Pubbliċi u l-leġiżlazzjonijiet tal-Ħwienet tal-Karità b’mod immedjat u jibda konsultazzjoni serja mal-għaqdiet volontarji u l-Kunsill tal-istess settur biex tinstab l-aħjar triq f’dan ir-rigward.  

L-għaqdiet volontarji insistew li jemmnu li huma għandhom dejjem ikunu trasparenti u kontabbli fl-operat tagħhom.  Il-Liġi (ATT Nru. XXXVI tal-2018) li tirregola dawn l-għaqdiet għenet biex dan ikun assigurat.   

Madankollu, l-għaqdiet sostnew li l-Avviżi Legali 371 u 390 (2020) dwar regolamenti għal attivitajiet tal-Kollezzjonijiet Pubbliċi u l-leġiżlazzjonijiet tal-Ħwienet tal-Karità li ħarġu dan l-aħħar, għalkemm huma ddikjarati li qed jiġu introdotti biex tissaħħaħ it-trasparenza u l-kontabilità, fil-prattika, se jkunu qegħdin joħolqu burokrazija żejda li l-għaqdiet mhumiex ippreparati għaliha.  Dawn ir-regolamenti li qed jiddaħħlu bla ebda konsultazzjoni (li l-Liġi f’artiklu 39 1,1a tippromwovi l-konsultazzjoni) mal-għaqdiet volontarji nfushom qed imorru ’l hinn mill-iskop iddikjarat tagħhom, u f’numru ta’ aspetti qed jintroduċu xogħol dupplikat u bla bżonn li se tissarraf f’telfien ta’ dħul finanzjarju kbir li dawn l-għaqdiet tant għandhom bżonn biex ikunu jistgħu jkomplu joperaw b’mod speċjali f’dan iż-żmien ta’ pandemija (post-COVID).

Huma sostnew li min ilu jaħdem fis-settur tal-volontarjat jaf li ħafna minn dak li qed jiġi mitlub mill-għaqdiet volontarji permezz ta’ dawn l-Avviżi Legali mhuwiex prattiku, ma jirriflettix ir-realtajiet li dawn l-għaqdiet joperaw fihom u se jpoġġu piż kbir fuq ir-riżorsi umani li parti kbira minnu jsir b’mod volontarju, kif ukoll impatt finanzjarju tal-għaqdiet infushom, liema piż se jwassal biex jiddemoralizza bil-kbir lil min imexxi dawn l-għaqdiet għad-detriment tal-benifiċjarji tagħhom.

L-għaqdiet qalu li jemmnu li r-regolamenti eżistenti biex jassiguraw it-trasparenza u kontabilità huma għodda li għandha tilħaq l-għan iddikjarat.   Ikun iktar għaqli jekk tassew nemmnu fis-settur li jingħata bidu għall-konsultazzjoni serja mal-għaqdiet volontarji kollha biex tinstab l-aħjar triq f’dan ir-rigward għall-ġid tas-settur volontarju, tal-għaqdiet, ħaddiema, voluntiera u benifiċjarji, temmew jgħidu l-għaqdiet.

L-istqarrija kienet iffirmata minn dawn l-għaqdiet: