L-awtoritajiet tas-Saħħa fl-Istati Uniti sejħu għal ‘pawża’ fl-użu tal-vaċċin tal-Johnson & Johnson kontra l-coronavirus, wara rapporti dwar każi ta’ trombożi mill-aktar rari fost persuni li ħadu din id-tilqima.
Il-Food and Drug Administration (FDA) tal-Istati Uniti sadanittant qalet li qed tieħu l-passi ‘b’sens kbir ta’ kawtela’ u li nstabu sitt każi ta’ ‘blood clotting’ ( każi ta’ demm miġmugħ) f’aktar minn 6.8 miljun doża ta’ dak il-vaċċin.
Ir-rakkmandazzjoni hi simili għall-każ tal-vaċċin tal-AstraZeneca fejn ukoll feġġew indikazzjonijiet rari ferm ta’ trombożi li setgħu kienu relatati mad-dożi.
L-FDA, f’sensiela ta’ tweets, qalet li l-aġenzija Centers for Disease Control and Prevention (CDC) qed tirrevedi s-sitt każi partikulari u li r-rakkmandazzjoni biex it-tilqim bil-vaċċin ta’ Johnson & Johnson jieqaf għalissa saret ‘biex taċċerta li l-komunità inkarigata mill-kura tas-saħħa tkun konxja mill-potenzjal tat-trombożi, rari kemm hu rari’.
Stqarrija tal-FDA u s-CDC iċċarat li l-każ tat-trombożi huwa ta’ tip li jaffettwa lill-moħħ ( ċerebrali) magħruf bħala venous sinus thrombosis (CVST). Dan it-tip ta’ blood clot jeħtieġ trattament differenti minn tas-soltu.
Intant, is-sitt każi ta’ trombożi kollha jinvolvu nisa bejn it-18 u t-48 sena – u meta s-sintomi feġġewlhom bejn sitta u tlettax-il jum wara li kienu tlaqqmu bil-vaċċin ta’ Johnson & Johnson.
In-New York Times ikkwotat lill-uffiċjali fis-sens li ‘mara minnhom mietet’ u li tieni mara, residenti ta’ Nebraska, tinsab f’sitwazzjoni kritika’.
