L-Iran u l-potenzi tad-dinja komplew mill-ġdid it-taħditiet fi Vienna biex isalvaw il-ftehim nukleari storiku tal-2015. Madankollu, il-proċess jista’ ikun ikkumplikat bid-deċiżjoni tal-Iran biex iżid l-irraffinar tal-uranju li jista’ jintuża fil-produzzjoni ta’ armi atomiċi. Fl-istess ħin, l-Iran qed jakkuża lil Iżrael dwar ‘sabutaġġ’ fil-konfront tas-sit nukleari ta’ Natanz – u wara l-isplużjoni tal-Ħadd fil-faċilitàinkwistjoni.
Sadanittant, l-Iran qed jaħseb biex l-irraffnar tal-uranju jiżdied għal 60 fil-mija li hu pass kbir eqreb id-90 fil-mija meħtieaġ għall-materjal li jintuża għal skopijiet militari.
L-Istati Uniti u l-Unjoni Ewropea kritikaw dan il-pass mir-reġim ta’ Tehran u wissew li l-inizjattiva tmur kontra l-isforzi lejn il-qawmien mill-ġdid tal-ftehim nukleari storiku.
Il-fatt li l-Iran qed jirrifjuta taħditiet diretti mal-Istati Uniti wassal, il-ġimgħa l-oħra, biex medjaturi Ewropej jivvjaġġaw bejn lukandi separati fi Vienna fejn kienu alloġġjati r-rappreżentanti tal-pajjiżi rivali. Dan waqt li l-Iran u l-Istati firmatarji oħrajn kienu ħadu sehem fl-ewwel rawnd ta’ taħditiet kostruttivi biex isalvaw il-patt tal-2015.
