Il-European Medicines Agency (EMA) qalet li sabet konnessjoni potenzjali bejn it-tilqima tal- Johnson & Johnson għal kontra l-Covid-19 u każi rari ħafna ta’ trombożi fil-pazjenti.
L-istess regolaturi qalu li dawn il-każi għandhom jitqiesu bħala ‘side effects mill-aktar rari’ tal-vaċċin inkwistjoni. Fl-istess ħin, ir-regolaturi enfasizza li ‘il-benefiċċji tat-tilqima (tal-Johnson & Johnson) għal kontra l-coronavirus huma ferm akbar mill-element ta’ sogru rifless fis-side effects. ‘
It-twissija ġdida qed tibbaża fuq tmien każi ta’ trombożi fl-Istati Uniti — b’wieħed minn dawn il-każi jirriżulta fil-mewt tal-persuna.
Dawn it-tmienja kienu kollha taħt is-60 sena u li t-trombożi żviluppatilhom fi żmien tliet ġimgħat wara li ħadu t-tilqima.
Il-vaċċin tal-Johnson & Johnson — li jibbaża fuq tilqima waħda aktar milli tnejn — ingħata lil aktar minn seba’ miljun persuna fl-Istati Uniti. L-istess vaċċin għadu ma ġiex approvat fir-Renju Unit iżda hu minnu li l-Gvern Britanniku, jiem ilu, kien ordna 30 miljun doża tal-Johnson & Johnson.
