Il-Gvern ma aċċetta l-ebda waħda mis-sitt emendi li tressqu mill-Oppozizzjoni waqt li fil-Kumitat tal-Abbozzi kienet qed tiġi diskussa l-liġi dwar it-Tribunal tal-Ambjent u l-Ippjanar. Dawn l-emendi saru bil-ħsieb li tiġi assigurata l-indipendenza, t-trasparenza u l-imparzjalita’ ta’ dan it-tribunal daqshekk importanti, sabiex itejjeb l-operat tiegħu u sabiex l-għaqdiet ambjentali jkunu jistgħu jappellaw minn deċiżjonijiet tal-Awtorita’ tal-Ippjanar u l-Awtorita’ tar-Riżorsi u l-Ambjent.
Fi stqarrija ffirmata mill-Kelliema Robert Cutajar, Joseph Ellis u Hermann Schiavone, il-Partit Nazzjonalista qal li l-atteġjament tal-Ministru Aaron Farrugia, li kien preżenti waqt dan il-kumitat wera biċ-ċar li jrid jżomm f’idejh il-poter li jaħtar il-membri ta’ dan it-tribunal u ma laqgħax il-proposta tal-Oppożizzjoni illi dawn jiġu maħturin minn kumitat indipendenti kif issa qed jinħatru l-membri tal-ġudikatura.
L-anqas laqa’ l-proposta li l-għaqdiet ambjentali jitpoġġew f’pożizzjoni li dejjem ikunu jistgħu jappellaw minn deċiżjonijiet ta’ dawn l-awtoritajiet daqshekk important. Dan peress illi skont il-Ministru Farrugia, tali miżura tista’ tagħti lok għall-abbuż. B’dan l-atteġjament il-Gvern Laburista reġa’ wera bil-fatti n-nuqqas ta’ fiduċja li għandu fl-għaqdiet ambjentali.
Il-Partit Nazzjonalista qal li għal darb’oħra l-Gvern Laburista wera li mhux veru kommess li jittratta l-materji tal-ambjent bis-serjeta’ li jixirqilhom u li f’dan il-qasam, bħal ħafna oħrajn, bejn il-paroli u l-fatti hemm baħar jikkombatti.
