Ir-rapport tal-Ombudsman wara li nvestiga l-każ li Robert Cutajar kelliem tal-Oppożizzjoni għall-Ambjent u Tibdil fil-Klima, ressaq dwar ħsarat li saru b’xogħlijiet illegali mill-Gvern Laburista f’Kemmuna, kkonkluda u kkonferma dak li qalet l-Oppożizzjoni Nazzjonalista sa mill-bidunett. Ix-xogħlijiet li saru f’Kemmuna, żona protetta, b’valur ambjentali u sit ta’ Natura 2000, saru bla permess u kkaġunaw ħsarat irreparabbli. Fil-konklużjonijiet tieghu, l-Kummissarju għall-Ambjent u l-Ippjanar fl-Uffiċċju tal-Ombudsman ixejjen l-iskużi li pprova jġib il-Gvern Laburista fejn qal li dawn ix-xogħlijiet kienu deskritti bħala t’emergenza.
Robert Cutajar kelliem tal-Oppożizzjoni għall-Ambjent u Tibdil fil-Klima, saħaq li dan mhux każ iżolat, anzi llum f’pajjiżna dan l-atteġjament tal-Gvern Laburista u tal-awtoritajiet tiegħu saru l-ordni tal-ġurnata. “Illum f’pajjiżna qegħdin ngħixu f’xenarju fejn flok il-Gvern u l-awtoritajiet tiegħu jharsu u jissalvagwardjaw l-ambjent, qegħdin ikunu huma l-protagonisti ewlenin fil-ħsara li qed issir lill-ambjent f’pajjiżna.”
L-Oppożizzjoni Nazzjonalista tibqa ma’ tifhimx kif il-Ministru responsabbli mill-ambjent jibqa’ sieket u ma’ jikkundannax dan l-atteppjament ripettitivli qegħdin nassistu għalih kuljum f’pajjiżna. Skiet li jtarrax. Il-Partit Nazzjonalista se jkun qed jinsisti li dak li talab u rrakomanda l-Ombudsman fuq dal-każ jiġu esegwiti mill-Gvern Laburista u l-awtoritajiet tiegħu. Il-Paritt Nazzjonalista se jkun qed jistenna wkoll b’ħerqa l-eżitu ta’ tmien każijiet
oħra li tressqu quddiem l-Ombudsman. Dawn il-każijiet kollha jitrattaw ħsarat ambjentali mwettqa minn awtoritajiet Governattivi.
Għall-Oppożizzjoni Nazzjonalista dan l-atteggjament tal-Gvern kontra l-interess tal-ġid komuni fil-qasam ambjentali mhux aċċettabbli. Fil-qasam tal-ambjent, il-Gvern għadu lanqas beda jifhem il-gravita’ tal-problemi li għandna u f’ħafna istanti huwa l-istess Gvern li qed jikkawżahom. Il-Partit Nazzjonalista jibqa’ determinat li ikompli jittrasforma ruħu f’għodda ġenwina kredibbli għat-tisħieħ tal-ambjent f’pajjiżna. Għall-Partit Nazzjonalista l-bżonn ta’
rivoluzzjoni fl-ambjent f’kull sens bil-fatti u mhux bil-kliem hija prijorita’.
