Il-proġett ta’ restawr fuq il-Palazz tal-Gran Mastru wasal fit-tieni fażi tiegħu. Dan kien infurmat bih il-President ta’ Malta George Vella waqt żjara li matulha seta’ jsegwi aktar mill-qrib ix-xogħol li qed isir minn ħaddiema u esperti ta’ Heritage Malta.
Il-Perit David Zahra, il-Kap tal-Proġetti ta’ Heritage Malta, spjega lill-President kif it-tieni fażi tikkonsisti fir-restawr tal-ispazji tal-palazz magħrufa bħala state rooms kif ukoll l-Uffiċċju tal-President innifsu. Dan fl-istess waqt li qed jissokta x-xogħol tal-ewwel fażi li huwa partikolarment maħsub biex jimplimenta esperjenza ġdida għall-viżitaturi li fil-futur iżuru dan il-palazz. Qed jiġu installati wkoll sistemi bil-għan li jkun indukrat dan il-patrimonju.
F’kelmtejn waqt din iż-żjara, il-President George Vella fisser is-sodisfazzjon tiegħu għax-xogħol metikoluż u xjentifiku li qed isir u li fi kliemu ser jirriżulta biex min iżur il-palazz ’il quddiem, jgħix mill-ġdid l-istorja li sawret dan il-palazz mis-seklu 16 sal-lum. Il-proġett fuq il-Palazz tal-Gran Mastru qed isir b’investiment ta’ 28 miljun ewro, b’kofinanzjament Ewropew.
