L-Assoċjazzjoni Maltija tal-Industrija tad-Divertiment u l-Arti, l-MEIA, tinsab inkwetata u mħassba minħabba l-impatt psikoloġiku li qed tħalli l-pandemija tal-Covid-19 fuq l-artisti lokali.
F’intervista mal-Malta Business Weekly, il-President tal-MEIA Howard Keith Debono, spjega illi l-artisti li jaħdmu f’dan il-qasam ma jistgħux iħallu l-karriera tagħhom f’ġenb ….wara tant snin ta’ ħidma… biex isibu mpjieg ieħor. Hu stqarr li s-sitwazzjoni tant hi tragika, li ħafna minn dawn l-artisti qegħdin fix-xifer li jneħħu ħajjithom b’idejhom.
Horad Keith stqarr illi meta l-organizzazjonijiet f’din l-industrija ma jiġux ikkonsultati mill-awtoritajiet rigward il-miżuri tal-pandemija li jidaħħlu fis-seħħ, jinħoloq kaos kbir fost il-haddiema f’din l-industija, b’numru ta’ mistoqsijiet li jibqgħu mingħajr tweġiba. U spjega li minn naħa tagħhom, ma jkunux jistgħu jagħmlu l-parti tagħhom biex jgħinu u jtejbu s-sitwazzjoni.
Fejn tidħol l-edukazzjoni tal-arti, hu spjega li l-MEIA kienet tal-ewwel li enfasizzat fuq il-bzonn li nisimghu il-vuċi ta’ bosta skejjel tal-arti u tal-ispettaklu li xtaqu jiftħu mill-ġdid, fejn s’issa dawn għadhom ma rkuprawx.
Howard Keith Debono enfasizza li l-iskejjel tal-arti u tal-ispettaklu dejjem imxew mal-miżuri li ħarġu l-awtoritajiet tas-saħħa sa mill-Lulju tas-sena 2020 u sostna illi dawn l-iskejjel m’humiex is-sors tat-tixrid tal-virus… anżi, l-iskejjel tal-arti u tal-ispettaklu offrew serħan il-moħħ lil eluf ta’ studenti illi l-istil ta’ ħajjithom ġie affetwat drastikament b’riżultat tal-Covid-19.
