Raġel ta’ 37 sena minn Ħal-Qormi ġie kundannat disa’ xhur ħabs u mmultat €1,500 mill-Maġistrat Natasha Gaea Sciberras wara li nstab ħati li kellu 98 pillola ecstacy. Aaron Azzopardi inqabad bid-droga meta kien f stabbiliment ġewwa Paceville fl-14 ta’ April tal-2013 bejn is-sagħtejn u t-tlieta ta’ filgħodu.
Il-Qorti kkunsidrat il-fatt li ma hemm l-ebda dubju illi l-ammont ta’ 19-il pillola ecstasy li nstabu fuq il-persuna tiegħu ġewwa l-istabbiliment, mhuwiex ammont ta’ pilloli li normalment wieħed jassoċjah ma’ użu personali, aħseb u ara meta fil-vettura li kienet qed tintuża minnu kellu ammont ieħor ta’ 79 pillola.
Fl-istqarrija tiegħu qal li huwa kien mar Paceville waħdu għall-ħabta tal-11.00 p.m. u f’xi ħin daħal fi stabbiliment biex jieħu drink, u twaqqaf mill-pulizija għall-ħabta tas-2.15 a.m. B’referenza għall-pilloli ecstasy li nstabu fil-pussess tiegħu, qal li dawn kien se jikkunsmahom f’lejl wieħed, filwaqt li żied jgħid illi anke l-pilloli li nstabu fil-vettura kienu għall-użu personali tiegħu.
Ċaħad li huwa kien qed ibiegħ il-pilloli ecstasy fl-istabbiliment, u qal li l-pilloli li kellu fuqu kienu ntiżi għalih u li kien ilu daqxejn jabbuża mid-droga. Qal ukoll illi kien juża d-droga fil-weekend biss. Mistoqsi għalfejn kellu dak l-ammont konsiderevoli għall-weekend wieħed, l-imputat jgħid illi kien xtrahom f’daqqa, kellu ftit fuqu u l-bqija fil-karozza. Xtara l-pilloli bil-prezz ta’ €300 biex iservuh għal xahrejn.
Kien għadu kif xtrahom u baqa’ sejjer bihom Paceville. Huwa talab illi fl-atti proċesswali tiġi nserita relazzjoni ta’ Dr. Edward Curmi, nominat bħala espert fi proċeduri separati quddiem il-Qorti kontrih, u dan bl-iskop illi huwa jirrelata dwar jekk l-imputat kienx dipendenti fuq id-droga f’Jannar 2007 u s-sena ta’ qabel.
Minn din ir-relazzjoni jirriżulta illi l-imputat kien dipendenti fuq id-droga f’Jannar 2007 u fis-sena ta’ qabel u li tali dipendenza kienet waħda gravi u medika. Skont l-istess espert, l-imputat kellu, u fiż-żmien tar-relazzjoni, kien għad għandu problema ta’ droga, partikolarment fl-użu tal-kannabis, u li maż-żmien għamel użu ta’ ċertu ‘hard drugs’ li affetwawlu s-saħħa mentali tiegħu.
Skont l-istess relazzjoni, ta’ 16-il sena beda jespertimenta mid-droga b’mod partikolari mill-kannabis u ta’ 18-il sena beda jmur il-parties u jieħu ammont sostanzjali ta’ drogi differenti. F’lejl kien jesperimenta minn diversi tipi ta’ sustanzi lleċiti u skont hu “f’lejl kellhu il-kapacita’ jibla 25 pillola ta’ l-ecstasy jew hames grammi kokaina”.
Għamel żmien fejn kien ikkalma u kien qed jistudja biex isir Chef, iżda meta miet missieru f’xahar nefaq il-wirt kollu fuq drogi u spiċċa b’dejn ta’ €70,000. Wara xi żmien daħal f’relazzjoni li damet għaddejja seba’ snin u nofs u hawnhekk naqqas ħafna mill-użu tad-droga.
Il-Qorti qalet li filwaqt li m’għandhiex dubju illi l-imputat kien jagħmel użu mid-droga, madankollu ma tistax ma tqisx ukoll illi din ir-relazzjoni kienet qegħda tistħarreġ is-sitwazzjoni tal-imputat b’referenza partikolari għal Jannar tas-sena 2007 u s-sena ta’ qabel.
Il-Qorti qalet li ma hemm l-ebda indikazzjoni speċifika dwar is-sitwazzjoni ta’ Azzopardi fiż-żmien dan il-każ, fejn huma ma ġabx prova, imqar sal-grad tal-probabbli, sabiex jiġġustifika l-fatt illi fuq il-persuna tiegħu, huwa kellu dawk l-ammonti kollha ta’pilloli ecstasy fil-lejl in kwistjoni.
Il-Qorti qalet li huwa kien qiegħed ġewwa stabbiliment f’Paceville, meta diġa` kienu saru s-2.15 a.m. fil-mument li ġie arrestat u minkejja li għal xi wħud, inkluż għall-imputat jista’ jkun il-każ illi kif jgħidu “the night was still young”, anke li kieku l-istess imputat kellu jieħu pillola fis-siegħa sad-9.00 a.m. xorta waħda ma ssib l-ebda ġustifikazzjoni għall-fatt illi fuq il-persuna tiegħu, huwa kellu 19-il pillola. Bħal ma ħalla warajh 79 pillola fil-vettura li kien qed jagħmel użu minnha, l-imputat seta’ faċilment iħalli iżjed pilloli warajh u jżomm biss dak l-ammont li kellu bżonn għall-użu tiegħu.
Il-Qorti qalet ukoll li l-imputat qal illi huwa kien xtara dawn il-pilloli biex iservuh xahrejn, kif ukoll illi kien jagħmel użu minnhom fil-weekends biss, li jfisser allura illi fuq perjodu ta’ xahrejn, jekk wieħed iqis ċirka tmien weekends, l-imputat akkwista bi 12-il pillola għal kull weekend, li jfisser ukoll allura illi fuqu, f’lejl wieħed, diġa` kellu iżjed pilloli milli kien qed jipprospetta li juża f’weekend sħiħ.
L-ammont globali ta’ pilloli fil-pussess tal-imputat fuq il-persuna tiegħu ġewwa stabbiliment f’Paceville, fis-2.15 a.m. tfisser li kellu d-droga f’ċirkostanzi mhux għal użu personali ġiet ippruvata. Dwar li kkommetta reat ġewwa distanza ta’100 metru mill-parametru ta’ skola, klabb jew xi post simili fejn normalment jiltaqgħu ż-żgħażagħ, huwa nstab fil-pussess ta’ 19 il pillola ecstasy fi stabbiliment. Id-difiża stess iddikjarat illi ma kienx hemm kontestazzjoni minn naħa tagħha, illi fil-mument tal-arrest tiegħu, l-imputat kien jinsab f’post li jiffrekwentaw iż-żgħażagħ.
Dwar l-akkuża li kkommetta reat waqt li kien taħt Ordni ta’ Probation, il-Prosekuzzjoni, qalet il-Qorti baqgħet ma esebietx kopja legali ta’ din is-sentenza. Għaldaqstant din l-imputazzjoni ma tirriżultax sodisfaċentement ippruvata.
Għal fini ta’ piena, il-Qorti ħadet in konsiderazzjoni l-kondotta tal-imputat kif aġġornata sa April 2021, mil-liema jirriżulta illi l-imputat kellu biss skontru wieħed mal-ġustizzja u dan b’rabta ma’ pussess tar-raża tal-kannabis li jirrisali għas-sena 2006, dwar liema huwa ngħata Ordni ta’ Probation.
Qieset ukoll in-natura serja tal-ammont ta’ pilloli in kwistjoni, fejn l-imputat instab ħati ta’ pussess ta’ mediċina psikotropika u ristretta f’tali ċirkostanzi li juru li din ma kinitx għall-użu esklussiv tiegħu. Qieset ukoll mill-banda l-oħra, illi mir-relazzjoni tal-espert Dr Edward Curmi, jirriżulta illi sas-sena 2019, għalkemm l-imputat ma kienx irrijabilita ruħu għal kollox mill-vizzju tad-droga, madankollu għamel progress in kwantu qata’ l-użu ta’ ċerti sustanzi u kellu mpjieg stabbli. Għaldaqtant huwa ġie kundannat disa’ xhur priġunerija u multa ta’ €1,500. Il-Prosekuzzjoni tmexxiet mill-Ispetturi Jason Francis Sultana u Daryl Borg.
