Dalgħodu fit-8:15am, il-Pulizija ġiet infurmata li kien għadu kemm seħħ inċident stradali fi Triq Birkirkara, San Ġiljan.
Mill-ewwel investigazzjonijiet irriżulta li Bulgara ta’ 32 sena, intlaqtet minn karozza tat-tip Fiat Punto, li kienet qed tinstaq minn Norveġiża ta’ 43 sena residenti Tas-Sliema.
Il-vittma ngħatat l-ewwel għajnuna minn tim mediku, ittieħdet l-Isptar Mater Dei u ġiet iċċertifikata bi ġrieħi serji.
Il-Maġistrat tal-Għassa Donatella Frendo Dimech ġiet infurmata bil-każ u ħatret inkjesta.
Il-Pulizija għaddejja bl-investigazzjonijiet fuq il-każ.
