Il-Papa Franġisku ikkonferma lil Stephen Chow bħala l-Isqof ġdid ta’ Hong Kong — liema territorju, fil-preżent, qed ikun suġġett għal kampanja ta’ ripressjoni miċ-Ċina.
Il-ħatra tal-isqof ġdid, filwaqt li hi waħda sinifikattiva, spikkat ukoll fost id-diżgwid bejn Beijing u l-Vatikan – u meta l-Punent qed jesprimi dejjem aktar inkwiet dwar it-theddida għad-drittijiet umani f’Hong Kong.
L-eks kolonja Britannika ta’ Hong Kong kienet għaddiet taħt il-kontroll taċ-Ċina fl-1997 u t-territorju hu magħruf madwar id-dinja bħala hub finanzjarju importanti.
Intant, iċ-Ċina qed tinsisti b’kampanja biex tnaqqas il-libertà ta’ Hong Kong bħala distrett semi-awtonomu u fejn qed tieħu dejjem aktar miżuri ħorox kontra l-attivisti favur id-demokrazija f’dan it-territorju.
Fl-istess ħin, il-ħatra ta’ Stephen Chow bħala l-Isqof ta’ Hong Kong kienet ilha mistennija. Dan meta Chow, li jmexxi l-Ordni tal-Ġiżwiti f’Hong Kong, qed jieħu post il-Kardinal John Tong li kien responsabbli mill-kariga ( ta’ Isqof ta’ Hong Kong) f’kapaċità temporanja wara l-mewt tal-Isqof preċedenti, Michael Yeung, f’Jannar tal-2019.
Ir-reliġjużi u uffiċjali ewlenin f’Hong Kong li huma familjari mas-sitwazzjoni qalu li l-Isqof ġdid issa jeħtieġ li jnaqqas it-tensjoni fost id-diversi gruppi li jiffurmaw din il-komunità partikulari. Dan meta f’Hong Kong hemm ir-residenti li jridu li d-djoċesi tagħmel aktar biex tiddefendi l-kunċett tal-libertà fl-eks kolonja Britannika u meta mill-banda l-oħra hemm membri influwenti tal-establishment lokali li qed jappoġġjaw lill-Gvern taċ-Ċina.
Intant, Hong Kong ilu għexieren ta’ snin magħruf ukoll bħala ‘zona Kattolika’ taħt il-kontroll taċ-Ċina li hi amministrata mill-Partit Komunista li jibbaża fuq kunċett tal-ateiżmu.
