Malta kwalifikat għall-finali tal-Eurovision Song Contest li se ssir nhar is-Sibt li gej f’Rotterdam. Dan wara li Destiny ghaddiet b’success mill-ewwel semi finali.
L-isem ta’ Malta kien il-ħames mill-għaxar kanzunetti li għaddew għall-finali, għalkemm dan ma jirriflettix il-punti li ġew mgħotija lil kull pajjiż.
Grazzi għall-interpretazzjoni impekkabbli tal-kantanta Maltija Destiny bil-kanzunetta ‘Je Me Casse’ ….pajjiżna kwalifika għal din il-finali tal-65 edizzjoni ta’ dan il-Festival, segwit minn miljuni ta’ nies madwar id-dinja.
It-Tlieta filghaxija, Destiny kantat l-aħħar waħda wara 15-il kanzunetta, b’bosta Maltin u Għawdxin kienu qed jistennew bil-ħerqa l-interpretazzjoni taghha.
Flimkien ma’ Malta…. kwalifikaw ukoll mill-ewwel semi finali 9 pajjiżi oħra; in-Norveġja, Iżrael, Russja, l-Ażerbajġan, il-Litwanja, Ċipru, Żvezja, Belġju u l-Ukrajna.
Il-Ħamis, se tkun qed tiġi organizzata t-tieni semi finali tal-Festival. U nhar is-Sibt Malta se tkun fost is-26 pajjiż li se jkunu qed jissieltu għat-titlu tal-Eurovision.
S’issa, nafu li Destiny se tkun qed tkanta fl-ewwel parti tal-finali nhar is-sibt li ġej, u wara s-serata tal-Ħamis se tkun qed tiġi mħabbra ir-running order tal-finali….wara li tiġi approvata mill-European Broadcasting Union.
Fost il-favoriti li jirbħu l-65 edizzjoni tal-Eurovision hemm l-Italja, Franza…u l-kanzunetta ta’ Malta.
