Hekk kif kibret l-istennija għal min se jkunu is-26 plejer li Gareth Soutgate se jsejjaħ għall-Euro 2020, ħarġet l-aħbar li wieħed mill-gowlkipers li kien mistenni jkun inkluż, Nick Pope, mhux se jkun disponibbli, hekk kif se ssirlu operazzjoni f’irkopptejh.
Jidher li din l-operazzjoni mistennija tħallih barra mill-azzjoni għal ftit aktar minn xahar, bil-gowlkipers Jordan Pickford u Dean Henderson mistennija jkun iż-żewġ gowlkipers prominenti fl-iskwadra. Ħafna kienu dawk li spekulaw li fil-Euro 2020 Pope kien se jkun il-gowlkiper numru 1 tal-Ingliżi, wara li dan l-istaġun kien l-aqwa gowlkiper Ingliż fil-Premier League fejn ma’ Burnley żamm 11-il ‘clean sheet’.
Min jista’ jieħu post Nick Pope mal-iskwadra Ingliża ?
Jidher li l-għażla ta’ Gareth Southgate għat-tielet gowlkiper mal-iskwadra Ingliża se taqa’ fuq il-gowlkiper ta’ West Brom Sam Johnstone. L-eks gowlkiper ta’ Manchester United, li għandu 28 sena, għadu ma ddebuttax mal-iskwadra ewlenija tal-Ingilterra, għalkemm Johnstone kien msejjaħ għall-partiti ta’ kwalifikazzjoni għat-Tazza tad-Dinja tal-2022, f’ Marzu li għadda.
