Roberto Mancini, kowċ tat-tim nazzjonali Taljan, jinsab ottimist li Marco Verratti se jkun qed jirkupra fil-ħin biex jilgħab fil-Euro 2020. Lejliet il-partita ta’ ħbiberija li l-Italja se tkun qed tilgħab għada kontra San Marino, Mancini ta l-aħħar dettalji dwar il-kundizzjoni fiżika tal-midfielder Verratti u qal li l-plejer ta’ PSG fi Franza, qed jirkupra mid-daqqa li sofra “aktar malajr milli mistenni”.
Mancini żied jgħid li “is-sitwazzjoni tiegħu tjiebet ħafna fl-aħħar 15-il jum,” Il-kowċ Taljan se jkun qed jistenna sal-aħħar biex iħabbar l-iskwadra finali ta’ 26 plejer għall-Euro 2020, hekk kif l-aħħar ġurnata li tim jista’ jħabbar il-lista tal-plejers tiegħu hija nhar it-Tlieta li ġej, 1 ta’ Lulju.
Attwalment, Mancini għandu skwadra ta’ 33 plejer u apparti Verrati, fl-iskwadra proviżorja tal-Italja hemm erba’ plejers oħra li huma dubjużi minħabba injury. Dawn huma d-difensur Leonardo Spinazzola u l-midfielder Lorenzo Pellegrini ta’ Roma, id-difensur ta’ Lazio Francesco Acerbi u l-midfielder ta’ Inter Stefano Sensi.
