EURO 2020 • Futbol • Sport

Min se jkun l-aqwa skorer tal-Euro 2020 dan is-sajf?

27 ta' Mejju 2021
Kyrian Mbappe u Cristiano Ronaldo

Hekk kif ninsabu 15-il jum biss ‘il bogħod mill-bidu tal-akbar avveniment tal-futbol fid-dinja għal din is-sena, il-Euro 2020, aktar m’hu qed joqrob il-bidu uffiċjali ta’ din il-kompetizzjoni tal-UEFA, aktar qed jikber l-eċitament u l-istennija tad-dilletanti kollha tal-futbol internazzjonali. Probabilment, wara nhar is-Sibt li ġej, meta tintlagħab il-finali tal-UEFA Champion League bejn Manchester City u Chelsea, l-attenzjoni ta’ kulħadd tkun speċifikament fuq is-16-il edizzjoni ta’ dawn il-Kampjonati Ewropej, li din is-sena se jkunu qed jintlagħabu fi ħdax-il belt, ta’ ħdax-il pajjiż differenti.

Il-kowċis tal-24 tim finalist, mhux kollha ħabbru l-iskwadra finali u grazzi għar-rappurtaġġ estensiv li qed tagħti t-taqsima sport fil-kamra tal-aħbarijiet ta’ Net News, kulħadd għandu aċċess biex isegwi l-aħħar aħbarijiet marbuta mal-Euro 2020. Iżda ġimgħatejn biss ‘il bogħod mill-bidu tal-Euro 2020, min huma l-plejers favoriti li fl-aħħa ta’ dan it-turnament Ewropew, jistgħu jispiċċaw l-ewwel fil-klassifika tal-aqwa skorers?

Din hija l-għażla tagħna. Sintendi għażla suġġettiva, li iżda hija mibnija fuq l-aħħar prestazzjonijiet ta’ dawk il-plejers li se nkunu qed naraw fl-azzjoni waqt il-partiti tal-Euro 2020.

1. Robert Lewandowski (Polonja)

L-attakkant Pollak ta’ 32 sena, Robert Lewandowski jinsab fl-aqwa vena bies jiskorja. Dan l-istaġun fil-Bundesliga Ġermaniża, skorja rekord impressjonanti ta’ 41 gowl għal Bayern Munich. Captain tat-tim nazzjonali ta’ pajjiżu. Sal-lum lagħab 118-il partita internazzjonali għall-Polonja, skorja 66 gowl u serva 23 assist.

2. Kylian Mbappe (Franza)

Kylian Mbappe hu wieħed mill-akbar fenomeni tal-mument. Jekk f’din l-edizzjoni jkun fil-vena li jiskorja, allura Franza għandhom possibiltajiet kbar li jiksbu suċċess fil-Euro 2020. Dan l-istaġun skorja 27 gowl ma’ PSG, f’Kampjonat li iżda ma rrnexxilhomx jirbħu. Ma’ dan l-ammont ta’ gowls wieħed irid iżid ukoll tmien gowls oħra li skorja dan l-istaġun fil-UEFA Champions League u seba’ gowls oħra fil-Coupe de France.

3. Harry Kane (Ingilterra)

Din tista’ tkun l-edizzjoni li l-captain tal-Ingilterra, Harry Kane jibqa’ jiftakar fil-pożittiv għal dejjem. Jagħlaq 28 sena f’Lulju u dan l-istaġun reġa’ sploda fl-attakk ta’ Tottenham Hotspur, b’total ta’ 23 gowl skorjat. Hu temm l-ewwel fil-klassifika tal-aqwa skorer tal-Premier League, b’gowl aktar minn Mohamed Salah ta’ Liverpool.

4. Cristiano Ronaldo (Portugal)

Possibilment din taf tkun l-aħħar edizzjoni tal-Euro għal Cristiano Ronaldo. 36 sena u għadu kemm temm staġun ma’ Juventus fejn skorja xejn inqas minn 36 gowl fil-kompetizzjonijiet kollha li lagħab, b’29 gowl minnhom skorjhom fis-Serie A. il-captain taċ-champions Ewropej, il-Portugall għandu rekord mill-aqwa ma’ pajjiżu; 173 partita u li fihom skorja ammont impressjonanti ta’ 103 gowls.

5. Romelu Lukaku (Belġju)

L-attakkant ta’ 28 sena, Romelu Lukaku dan l-istaġun kien f’forma mill-aqwa ma’ Inter tant li kien parti mis-suċċess tagħhom biex reġgħu rebħu s-Serie A wara ħafna snin. Lukaku skorja 30 gowl, 44 partita li lagħab fil-kompetizzjonijiet kollha. Dan is-sajf, l-eks plejer ta’ Manchester United jista’ jkun arma importanti biex il-Belġju tikteb l-istorja għall-ewwel darba, u tirbaħ il-Kampjonati Ewropej.

6. Memphis Depay (Olanda)

L-iskorer prolifiku tal-Olanda f’din l-edizzjoni, għandu jkun l-attakkant ta’ 27 sena, Memphis Depay. Dan hu sajf importanti għal dan il-plejer hekk kif wara ħames staġuni fi Franza ma’ Lyon, fejn ma rebaħ xejn bħala tim, se jkun qed jissieħeb ma’ klabb ieħor, x’aktarx Barcelona. Dan l-istaġun, f’Ligue 1, għad-dell ta’ Kyrian Mbappe ta’ PSG, Depay temm bħala t-tieni l-aqwa skorer tal-Kampjonat Franċiz, b’kwota ta’ 20 gowl skorjat, l-istess daqs kemm skorja Wissam Ben Yedder ta’ Monaco. B’hekk Depay skorja seba’ gowls anqas minn kemm skorja Mbappe.

7. Alvaro Morata (Spanja)

L-attakkant Spanjol ta’ 28 sena, Alvaro Morata, għadu kemm temm it-tielet staġun tiegħu fl-Italja ma’ Juventus. Fi ftit inqas minn 140 partita fis-Serie A, Morata skorja kważi 50 gowl. Dan l-istaġun skorja total ta’ 20 gowl f’44 partita li lagħab ma’ Juventus, fil-kompetizzjonijiet kollha. Minn dawn, 11-il gowl minnhom kienu skorjati fis-Serie A u sitt gowls oħra skorjhom fil-UEFA Champions League. Fl-aħħar tliet snin, ma’ Spanja hu skorja biss sitt darbiet, iżda din l-edizzjoni taf tkun opportunitá biex ikun l-aqwa skorer tat-tim, l-istess kif kien fl-aħħar edizzjoni tal-Euro, fl-2016.

8. Timo Werner (Ġermanja)

Timo Werner jista’ jkun wieħed mit-talenti ‘l kbar li jkunu fost il-protagonisti f’din l-edizzjoni tal-Euro. Wara staġun mill-aqwa fil-Bundesliga ma’ RB Leipzig, fejn skorja total ta’ 28 gowl fil-Kampjonat, dan l-istaġun kien trasferit għal ma’ Chelsea fl-Ingilterra, għas-somma ta’ €53 miljun. L-ammont ta’ gowls li skorja fil-Premier League kien ftit ħdejn dak li skorja fl-istaġun ta’ qabel iżda kompla jikber fil-personalitá u l-abiltá tiegħu.Werner jista’ jkun l-eroj tal-Ġermanja dan is-sajf.