Il-middleman fl-assassinju ta’ Daphne Caruana Galizia, Melvin Theuma, kien involut fi grupp kriminali li wettaq serje ta’ serqiet ewlenin madwar ħdax-il sen’ilu – inkluż il-hold up mill-Casino di Venezia fil-Birgu.
Hekk ġie rrapportat fil-ġurnal MaltaToday fejn ġie spjegat illi filwaqt li Theuma ma kellu l-ebda rwol dirett f’dawn is-serqiet, allegatament kien offra kenn lil kriminali f’waħda mill-proprjetajiet tiegħu wara wieħed mir-reati.
Din il-gazzetta żvelat li l-proklama li ngħata Melvin Theuma kienet tinkludi wkoll referenza għall-hold up li twettaq mill-kwartieri tal-Bank HSBC lura fl-2010 – hold up li b’rabta mieghu qed jiġi investigat mill-Pulizija l-Ministru fl-Uffiċċju tal-Prim Ministru, Carmelo Abela.
Melvin Theuma kien ingħata l-proklama lura fl-2019 fejn ta numru kbir ta’ recordings …fost l-ohrajn ma’ Yorgen Fenech, kif ukoll għadd ta’ persuni oħra b’rabta mal-omiċidju tal-ġurnalista Daphne Caruana Galizia.
Theuma kien ingħata l-maħfra anke b’rabta mas-serqiet mill-Bank HSBC f’Ħal Balzan fl-2007, u t-tnejn l-oħra mill-Casino di Venezia u mill-Kwartieri tal-HSBC fl-2010. Fil-Qorti, Theuma dejjem tkellem dwar l-involviment li kellhom fl-assasinju l-aħwa George u Alfred Degiorgio u Vincent Muscat – li dan tal-aħħar eventwalment ammetta l-parteċipazzjoni tiegħu fil-qtil u ġie kkundannat 15-il sena priġunerija.
Madanakollu Vince Muscat, il-Koħħu, għadu qed jistenna li jitla ġuri b’rabta mal-hold up fil-Bank HSBC fl-2010 – ġuri li ġie pospost fl-aħħar jiem wara li ħarġet evidenza ġdida b’rabta mal-każ, evidenza li allegatament lest jagħti l-istess Melvin Theuma.
Fl-aħħar xhur kemm il-Koħħu, kif ukoll l-aħwa Degiorgio għamlu talba għall-maħfra Presidenzjali u saħqu li lesti jikxfu l-ismijiet ta’ eks Ministru u Ministru preżenti fil-Kabinett ta’ Robert Abela – dwar l-involviment tagħhom f’serqa li seħħet snin ilu.
Iż-żewġt isimijiet li ssemmgħu b’insistenza kienu dawk tal-eks Deputat Mexxej Laburista u eks Ministru għall-Ekonomija Chris Cardona flimkien mal-Ministru Carmelo Abela. It-tnejn li huma qed jiċħdu dawn l-allegazzjonijiet.
