Illejla għadd ta’ timijiet li se jkunu qed jilagħbu fil-Euro 2020 se jkunu nvoluti f’għadd ta’ partiti ta’ ħbiberija fejn l-aktar li jispikka jkun il-konfront bejn il-Portugall u Spanja.
Fis-7.30pm | Spanja v Portugall
Konfront interessanti bejn żewġ timijiet li għandhom aspirazzjonijiet kbar għall-Euro 2020. Spanja li għandhom skwadra pjuttost żagħżugħa bil-kowċ Luis Enrique se jkun qed jagħmel numru ta’ tibdiliet biex jara l-aħjar sistema li juża matul dawn il-Kampjonati Ewropej. Il-Portugall se jkunu wieħed mill-isfidanti ewlenin li jirbħu dan it-tournament wara s-suċċess li kisbu fl-aħħar edizzjoni dik tal-2016. Fl-aħħar edizzjoni tat-Tazza tad-Dinja, iż-żewġ timijiet kien ltqagħu fl-ewwel partita tal-grupp fejn kienet intemmet 3-3.
Fid-8.45pm | Italja v Repubblika Ċeka
It-tim ta’ Roberto Mancini se jkun qed jilgħab it-tieni partita ta’ ħbiberija hekk kif wara r-rebħa ta’ 7-0 fuq San Marino, se jkun qed jaffaċċja avversarju aktar diffiċli hekk kif sa jkun qed jilgħab kontra wieħed mit-timijiet li se jikkompetu fil-Euro 2020. Ir-Repubblika Ċeka se jkunu qed jilagħbu l-ewwel partita ta’ ħbiberija bi tħejjija għal din il-kompetizzjoni qabel ma l-ġimgħa d-dieħla jilagħbu kontra r-Repubblika Ċeka.
Fis-6.00pm | Maċedonja ta’ Fuq v Kazakhstan
Il-Maċedonja se jkunu qed jilagħbu kontra l-Kazakhstan fl-ewwel partita ta’ ħbiberija bi tħejjija għad-debutt tagħhom fil-finali tal-Kampjonati Ewropej, bil-kowċ Igor Angelovski mistenni juża dawn il-partiti biex jesprimenta l-aħħar formazzjoni għall-Euro 2020.
Fis-6.00pm | Fillandja v Estonja
Fl-ewwel partita ta’ ħbiberija, il-Fillandja tilfu 2-0 kontra l-Iżvezja. Fil-partita ta’ llejla se jkunu qed jilagħbu kontra l-Estonja fejn il-Fillandja se jkunu jistgħu jużaw din il-partita biex jagħtu opportunità lill-players li ma lagħbux fl-ewwel partita ta’ ħbiberija.
Fit-8.00pm | Ungerija v Ċipru
L-Ungerija se jkunu qed jilagħbu l-ewwel partita ta’ ħbiberija tagħhom bħala preparazzjoni għall-Euro 2020 fejn kontra avversarju inqas kwotat, il-kowċ Marco Rossi se jkun qed janalizza l-aqwa ħdax li se jkun qed jilgħab bihom fl-ewwel partita tal-grupp, fi grupp ikkonsidrat diffiċli għall-Ungerija.
