Id-dekan fi ħdan il-Fakultà tal-Benesseri Soċjali fl-Università ta’ Malta, Andrew Azzopardi ppubblika rapport dwar l-iżolamet fil-ħabs Malti. Ir-rapport għandu l-għan li jqajjem kuxjenza u jiftaħ it-triq għal dibattitu dwar is-sistema korrettiva f’pajjiżna.
Id-dokument jagħti ħarsa lejn is-sitwazzjoni preżenti fil-ħabs b’mod partikolari is-solitary confinement jew l-iżolament tal-priġunier.
Fl-introduzzjoni r-rapport jgħid li l-iżolament huwa ksur tad-drittijiet umani.
L-effetti negattivi fuq il-fiżjoloġija u l-psikoloġija
Id-dokument jitkellem dwar l-effetti tal-iżolament, fost l-oħrajn effetti negattivi ferm fuq il-fiżjoloġija u l-psikoloġija tal-bniedem. Dawn l-effetti jistgħu jibdew jinħassu mill-priġunier fi żmien ftit jiem biss li jkun tpoġġa f’iżolament.
L-effetti jistgħu jinkludu wkoll ħsara kbira fl-istat emottiv tal-individwu, li jirriżultaw fi żbroffi emottivi ta’ spiss. Priġunier jista’ jispiċċa fi stat ta’ ansjetà u depressjoni riżultat ta’ dan it-tip ta’ korrezzjoni.
Effetti oħra jinkludu alluċinazzjonijiet, illużjonijiet panic attacks, telf ta’ memorja, u problemi fil-konċentrazzjoni, paranoia, u episodji vjolenti.
Minbarra l-effetti emottivi u psikoloġiċi, hemm ukoll dawk fiżjoloġiċi, fejn persuna li tkun iżolata tista’ ssir sensittiva żżejjed għal stimoli bħal dwal u ħsejjes. L-effetti jistgħu jestendu għal problemi fil-muskoli u letarġija.
Wieħed jista’ jesperjenza wkoll deterjorazzjoni fil-ħiliet soċjali tiegħu magħrufa bħala ‘mewt soċjali’. Dawn jinkludu soċjofobija, jew li wieħed jitlef l-abbiltà li jinteraġixxi ma’ persuni oħra.
L-impatt negattiv ma jinħasx biss mill-priġunieri. Ir-rapport jgħid uffiċjali tal-ħabs jitkellmu dwar livell ta’ stress ferm ogħla meta jaħdmu fis-sezzjoni tal-izolament.
Il-proposti tal-Fakultà
Il-prattika tal-iżolament hija kontroproduttiva fl-għanijiet tagħha meta wieħed iqis l-impatt negattiv ferm li jħalli fuq kull min hu involut fil-proċess. Dan minbarra li l-ispiża finanzjarja għal dan il-proċess huma ferm ogħla minn dak ta’ priġunerija normali.
Id-dokument jipproponi riforma sħiħa fil-leġiżlazzjoni, inkluż emendi fil-liġijiet ta’ Kapitlu 9 fil-Kodiċi Kriminali u t-tneħħija ta’ klawżoli marbuta ma’ iżolament.
Dan jsostni li s-sistema tal-ġustizzja f’pajjiżna għandha tinvesti fi strutturi riabilitattivi u ta’ servizzi tal-kura speċjalizzati li tkun kapaċi tifforma priġunieri li joħorġu minnhom bħala ċittadini responsabbli u mhux bil-kontra.
Ir-rapport jgħid li metodi bbażati fuq biżà ma jikkontribbwixxu assolutament xejn.
