EURO 2020 • Futbol • Gruppi • Sport

Analiżi | Iċ-Ċeki b’tamiet fqar ta’ progress, b’tim nieqes mill-ismijiet

9 ta' Ġunju 2021
Il-partitarji Ċeki jittamaw biss li f'din l-edizzjoni tal-Euro ma jerġgħux jgħixu l-istess diżappunt tal-aħħar edizzjoni li kienet saret fi Franza.

Għalkemm mhux favoriti li javvanzaw minn Grupp D, ir-Repubblik Ċeka jista’ jkun avversarju diffiċli biex tegħleb għal kwalunkwé tim

Għas-seba’ edizzjoni konsekuttiva, ir-Repubblika Ċeka huma fost il-pajjiżi finalisti tal-Kampjonati Ewropej. L-aqwa edizzjoni tagħhom f’dan it-turnament tibqa’ dik tal-1996. Dakinhar kienu waslu sal-finali, iżda kienu tilfuha fil-ħin barrani kontra l-Ġermanja.

L-ewwel ħdax tar-Repubblika Ċeka li kien bdew għall-partita ta’ ħbiberija li lagħbu kontra Ċipru, f’Nikosija, f’Ottubru li għadda. Dak in-nhar iċ-Ċeki rebħu 2-1.

Fl-aħħar Euro 2016, ir-Repubblika Ċeka ma rebħietx logħba minn tlieta li lagħbet.

Fil-Euro 2016, huma kellhom l-agħar prestazzjoni tagħhom minn daqstant edizzjonijiet, meta mhux biss m’għaddewx għall-istadju tal-aħħar sittax, iżda lanqas rebħu partita waħda minn tlieta. Minn wara dik l-edizzjoni ’l hawn, posthom fir-rankings tal-FIFA tbaxxa mhux ftit u llum jinsabu fl-40 post, iżda meta wieħed jiftakar li fl-2005, ir-Repubblika Ċeka kienu fit-tieni post ta’ dawn ir-rankings, allura wieħed jifhem aktar kemm dan in-nazzjonal iddgħajjef mhux ftit, anke jekk dejjem baqa’ jikkwalifika.

Jaroslav Šilhavý

ilu kowċ tar-Repubblika Ċeka

minn Settembru tal-2018.

Immexxija mill-kowċ ta’ 59 sena, Jaroslav Šilhavý, iċ-Ċeki kkwalifikaw għall-Euro 2020 bit-tieni post fl-istess grupp li kien iddominat mill-Ingilterra. Huma kellhom tliet telfiet fil-grupp kontra l-Bulgarija, Kosovo u l-Ingilterra.

L-iskwadra Ċeka li se naraw fil-Euro 2020, għandha nixfa ta’ individwalitá, iżda jekk hemm isem ta’ plejer li jispikka fuq il-kumplament, dan hu Tomáš Souček.

L-aspettattivi għal dan il-pajjiż din id-darba m’humiex għoljin, konxji mill-fatt li din hija skwadra nieqsa mill-ismijiet. Meta mqabbel mal-finalisti l-oħra, jeżisti nuqqas ta’ individwalitá u plejers li kapaċi jagħmlu d-differenza. Iżda jekk kellna nsemmu plejer partikolari, dan ikun il-midfielder difensiv ta’ West Ham United, Tomáš Souček. Matul il-partiti tal-Euro 2020, Šilhavý mistenni li jilgħab lil dan il-plejer fi rwol aktar offensiv, bl-għan li jisfrutta aktar l-enerġija u d-dinamiżmu tiegħu, li mhux li tant issib bħala fil-bqija tal-iskwadra Ċeka.

Tomáš Souček, 26 sena. Midfielder difensiv ta’ West Ham United. Kapaċi jiddefendi b’inteliġenza u l-aħjar tiegħu jkompli jidher meta jkun involut f’dwelli fl-arja ma’ plejer avversarju.
Vladimir Coufal se jkun qed jagħlaq 29 sena f’Awwissu li ġej. Kapaċi jilgħab fuq il-lemin, kemm bħala difensur kif ukoll f’nofs il-grawnd. Fis-sajf li għadda ħalla lil Slavia Praha biex issieħb lil West Ham United fil-Premier League Ingliż. L-ewwel staġun tiegħu fl-Ingilterra jista’ jitqis bħala wieħed pożittiv.
Jakub Jankto hu plejer ta’ 25 sena, li kapaċi jilgħab fi kwalunkwé posizzjoni offensiva mitluba mill-kowċ tiegħu. Fis-sajf ta’ sentejn ilu, Sampdoria kienu ħalsu għal Jankto s-somma ta’ €15-il miljun biex akkwistawħ mingħand Udinese.
Tomas Vaclik għalaq 32 sena f’Marzu li għadda. Il-gowlkiper Ċek jilgħab f’La Liga fi Spanja ma’ Sevilla, iżda dan l-istaġun, l-aktar minħabba l-isfortuna tal-injuries, Vaclik ftit lagħab u tilef postu fl-iskwadra mmexxija mill-kowċ Julen Lopetegui.

Dan se jkun grupp iebes ħafna għat-tim nazzjonali tar-Repubblika Ċeka u wieħed jistenna li jara approċċ b’mentalitá difensiva, b’formazzjoni ta’ 4-2-3-1. Plejers oħra importanti f’dan it-tim, apparti Souček, se jkunu Tomas Vaclik, Vladimir Coufal, Jan Boril, Jakub Jankto u Patrik Schick.

Supporter femminili tar-Repubblik Ċeka titbissem fl-isfond ta’ atmosfera ta’ ċelebrazzjoni waqt waħda mill-partiti tat-tim nazzjonali Ċek qabel faqgħet il-pandemija.
Il-partitarji tal-futbol fir-Repubblika Ċeka resqu viċn li jiċċelebraw il-possibiltá tar-rebħ tal-Eurp f’żewġ edizzjonijiet differenti u li kienu viċin xulxin. L-ewwel darba fl-1996 meta fl-Ingilterra kienu waslu sal-finali u f-tieni darba, fl-2004, kienu sfaw eliminati fl-istadju tas-semi-finali.

Is-26 plejer tar-Repubblika Ċeka għall-Euro 2020

Kowċ: Jaroslav Šilhavý

Jiri Pavlenka hu wieħed mit-tliet gowlkipers magħżula minn Jaroslav Šilhavý għall-Euro 2020. Jilgħab fil-Bundesliga Ġermaniża ma’ Werder Bremen. X’aktarx se jkun is-sostitut tal-gowlkiper numru wieħed Tomas Vaclik.

Gowlkipers: Tomas Vaclik (Sevilla), Jiri Pavlenka (Werder Bremen), Ales Mandous (Olomouc)

Difensuri: Vladimir Coufal (West Ham), Pavel Kaderabek (Hoffenheim), Ondrej Celustka (Sparta Praha), Tomas Kalas (Bristol City), David Zima (Slavia Praha), Jan Boril (Slavia Praha), Ales Mateju (Brescia), Jakub Brabec (Viktoria Plzen)

Jan Boril, 30 sena. Wieħed mid-difensuri magħżula fit-tim nazzjonali Ċek għall-Euro 2020. Dan l-istaġun ma’ Slavia Praha, fil-Kampjonat domestiku, għadu kemm rebaħ ir-raba’ Kampjonat tal-karriera tiegħu.
Il-midfielder ta’ 26 sena, Antonin Barak hu wieħed mill-plejers li jilgħabu ċentrali jew wara l-attakkanti. Propjetá ta’ Udinese fl-Italja, iżda fl-aħħar żewġ staġuni kien misluf lil Lecce u Verona rispettivament.

Midfielders: Lukas Masopust (Slavia Praha), Vladimir Darida (Hertha Berlin), Tomas Soucek (West Ham), Antonin Barak (Verona), Alex Kral (Spartak Moskva), Tomas Holes (Slavia Praha), Petr Sevcik (Slavia Praha), Jakub Jankto (Sampdoria), Adam Hlozek (Sparta Praha), Jakub Pesek (Liberec), Michal Sadilek (PSV)

Attakkanti: Patrik Schick (Leverkusen), Michael Krmencik (PAOK), Matej Vydra (Burnley), Tomas Pekhart (Legia)

Patrik Schick jiċċelebra wieħed mill-għaxar gowls li skorja sal-lum mat-tim nazzjonali Ċek.
Patrik Schick hu wieħed mill-attakkanti l-aktar interessanti minn nukleju ta’ plejers li jiffurmaw l-iskwadra Ċeka għall-Euro 2020. Fis-sajf li għadda, il-plejer ta’ 25 sena, issieħeb lil Bayern Leverkusen mingħand Roma għas-somma ta’ €26.5 miljun.