EURO 2020 Futbol Gruppi Sport

Analiżi | L-Iżvediżi jistgħu jissorprendu anke jekk mingħajr ‘Ibra’

Supporter tal-Iżvezja

Għas-sitt edizzjoni konsekuttiva, Żvezja se tkun qed tilgħab fil-fażi finali tal-Euro, b’tama li din id-darba jkollha riżultati aħjar minn dawk preċidenti.

L-Iżvediżi huma għal darb’oħra finalisti Ewropej, hekk kif fil-ħames edizzjonijiet preċedenti qatt ma fallew milli jkunu fost il-finalisti ta’ din il-kompetizzjoni. Iżda taqta’ barra l-edizzjoni tal-2004, li kienet saret fil-Portugal, meta kienu waslu sal-kwarti tal-finali, mill-bqija l-Iskandinavi dejjem kellhom wirjiet diżappuntanti. Hekk ġralhom ukoll fl-aħħar edizzjoni meta kienu eliminati wara l-fażi tal-gruppi.

Zlatan Ibrahimovic

Sa xahar qabel il-bidu ta’ din il-kompetizzjoni, l-Iżvediżi kien mingħalihom li fl-iskwadra tal-kowċ Janne Andersson, kien se jkun hemm l-attakkant veteran ta’ Milan Zlatan Ibrahimovic. Ġara iżda li l-plejer ta’ 39 sena weġġa’ f’partita kontra Juventus u ma kienx inkluż fost is-26 plejer magħżula, b’Jordan Larsson jieħu post ‘Ibra’. Larsson hu iben l-eks plejer internazzjonali Żvediż, Henrik Larsson. F’din l-iskwadra Skandinava hemm tliet attakkanti oħra żgħażagħ interessanti. Dawn huma Dejan Kulusevski ta’ Juventus, Alexander Isak ta’ Real Sociedad u Jens Cajuste ta’ Midtjylland.

Victor Lindelof
Mattias Svanberg
Marcus Berg

Uċuh oħra żgħażagħ f’din l-iskwadra mmexxija minn Andersson huma Victor Lindelof, difensur ta’ 26 sena li jilgħab ma’ Manchester United, il-midfielders Mattias Svanberg ta’ Bologna u Kristoffer Olsson ta’ Krasnodar. Flimkien ma’ dawn l-ismijiet hemm ukoll plejers ta’ esperjenza bħal Sebastian Larson, Marcus Berg u Mikael Lustig.

L-Iżvezja mistennija tilgħab b’sistema

tattika tradizzjonali ta’ 4-4-2

Il-kowċ tal-Iżvezja, Janne Andersson

Is-sistema tattika li probabilment se jkunu qed jilagħbu biha l-Iżvezja se tkun dik ta’ 4-4-2, bil-mira ta’ din l-iskwadra tibqa’ dik li jkollhom edizzjoni suċċess bħal ma kellhom fl-1992. Dakinhar huma kienu waslu sas-semifinali.

Partitarji tal-Iżvezja

Din id-darba, ix-xorti, tajba jew le, se tkun qed terġa’ tlaqqa’ lill-Iżvediżi mal-Ispanjoli, hekk kif dawn it-tnejn kienu fl-istess grupp ta’ kwalifikazzjoni. L-Iżvezja temmew it-tieni; ħames punti wara Spanja; fl-istess grupp li kien hemm fih Malta. Huma tilfu biss logħba waħda minn għaxra; il-logħba ta’ Madrid kontra Spanja, bl-iskor ta’ 3-0.

Is-26 plejer tal-Iżvezja għall-Euro 2020

Kowċ: Janne Andersson

Kristoffer Nordfeldt

Gowlkipers: Karl-Johan Johnsson (Kobenhavn), Kristoffer Nordfeldt (Genclerbirligi), Robin Olsen (Everton)

Difensuri: Ludwig Augustinsson (Werder Bremen), Pierre Bengtsson (Vejle), Marcus Danielson (Dalian Yifang), Andreas Granqvist (Helsingborg), Filip Helander (Rangers), Pontus Jansson (Brentford), Emil Krafth (Newcastle United), Victor Lindelof (Manchester United), Mikael Lustig (AIK).

Emil Krafth
Albin Ekdal

Midfielders: Jens-Lys Cajuste (Midtjylland), Viktor Claesson (Krasnodar), Albin Ekdal (Sampdoria), Emil Forsberg (Leipzig), Dejan Kulusevski (Juventus), Sebastian Larsson (AIK), Kristoffer Olsson (Krasnodar), Robin Quaison (Mainz), Ken Sema (Watford), Mattias Svanberg (Bologna), Gustav Svensson (Guangzhou).

Attakkanti: Marcus Berg (Krasnodar), Alexander Isak (Real Sociedad), Jordan Larsson (Spartak Moskva).

Jordan Larsson