Raġel arrestat wara qtil li seħħ fil-Marsa stqarr ma’ l-investigaturi li kien hu li wettaq l-omiċidju permezz ta’ daqqiet ta’ sikkina lill-kompatrijott tiegħu, imma fil-Qorti wieġeb li ma kienx ħati. AmoFrank Kwaku, ta’ 25 sena mill-Ghana, stqarr li wettaq il-qtil hekk kif kien qed jiġi arrestat ftit wara l-qtil tal-Ħamis bil-lejl.
Minkejja l-allegata konfessjoni, Kwaku wieġeb mhux ħati ta’ qtil u akkużi oħra meta tressaq quddiem il-Qorti s-Sibt. Isaac Kwabena Kyere ta’ 23 sena nqatel b’daqqiet ta’ sikkina wara li nqalgħet ġlieda fil-Marsa fi Triq it-Tigrija tard il-Ħamis filgħaxija.
Huwa nstab wiċċu ‘l fuq, mitluf minn sensih f’għadira demm u ddikjarat mejjet fuq il-post. Sussegwentement, is-suspettat ġie rintraċċat f’dar fi Triq Azzopardi għall-ħabta tas-1.30am tal-Ġimgħa, iżda pprova jaħrab mill-arrest billi ġera fuq il-bjut.
Eventwalment inqabad u l-arma tal-qtil, maħsuba li hija sikkina, instabet taħt siġra fi Triq il-Jum. Kwaku, li għandu karta tal-identità Taljana u jaħdem fl-industrija tal-kostruzzjoni, tressaq il-Qorti. L-Ispettur Kurt Zahra qal lill-Qorti li l-akkużat stqarr waqt l-arrest tiegħu u wara kkonferma l-konfessjoni tiegħu waqt l-interrogazzjoni tiegħu fil-kwartieri ġenerali tal-Pulizija.
Huwa madankollu wieġeb mhux ħati tal-akkużi miġjuba kontrih, inkluż li żamm lill-vittma kontra r-rieda tiegħu, li ma obdiex l-ordnijiet tal-pulizija u li ġarr arma waqt it-twettiq tad-delitt. Il-qtil huwa l-ewwel wieħed din is-sena. L-investigazzjonijiet għadhom għaddejjin, bil-Maġistrat Gabriella Vella tmexxi inkjesta.
Il-Maġistrat Rachel Montebello laqgħet talba għall-iffriżar tal-assi tal-akkużat. Ma saret l-ebda talba għal pleġġ. L-Avukati Anthony Vella u Etienne Savona prosekutaw flimkien mal-Ispetturi Zahra, Wayne Camilleri u Stacy Attard. L-Avukat Cynthia Tommassuolo dehret bħala Avukat tal-għajnuna legali.
