Sirjan ta’ 25 sena, residenti San Pawl il-Baħar, qed jinżamm arrestat b’rabta ma’ atti ta’ vandaliżmu fuq vetturi u ħwienet li seħħew illejl li għadda fil-Mellieħa.
Għall-ħabta tat-03:00 il-Pulizija ġiet infurmata li hemm persuna qiegħda twaddab il-ġebel lejn xi vetturi fi Triq il-Marfa.
Il-Pulizija tad-Distrett tal-Qawra marret mill-ewwel fil-post iżda ma nstab ħadd. Madankollu l-pulizija nnutaw xi vetturi li kienu pparkkjati u vetrini ta’ ħwienet, li kellhom ħsarat konsiderevoli, fosthom il-ħġieġ imkisser b’xi ġebel.
Il-pulizija ngħataw ukoll deskrizzjoni tal-persuna li allegatament kienet qed twettaq dawn l-atti vandali u bdew bit-tfittxija għaliha. Madwar nofs siegħa wara, ġie osservat raġel, li kien jaqbel mad-deskrizzjoni li ngħatat, miexi lejn ix-Xemxija. Huwa twaqqaf u ġie arrestat fejn ittieħed għal aktar investigazzjonijiet fil-lock-up tal-Pulizija fil-Kwartieri Ġenerali, il-Floriana.
Minn iżjed investigazzjonijiet li saru mill-Pulizija tad-Distrett, irriżulta li b’kollox instabu disa’ vetturi u tmien vetrini ta’ ħwienet bil-ħġieġ imkisser, tul Triq il-Marfa, Triq Ġorġ Borg Olivier u Triq il-Kbira, il-Mellieħa.
L-investigazzjonijiet għadhom għaddejjin.
