Hekk kif ninsabu resqin lejn l-aħħar fażi tal-Euro 2020, tkompli tikber il-possibilità ta’ finali bejn Ingilterra u Italja f’Wembley Stadium. Iż-żewġ nazzjonijiet kienu fost l-aħjar ta’ dawk li waslu sa din il-fażi hekk kif għadhom ma tilfux bl-Ingilterra jkun l-unika tim li ma sofriex gowl filwaqt li l-Italja sofriet gowl wieħed biss.
Fil-fażi tal-gruppi l-Ingilterra temmew fl-ewwel post fejn kisbu żewġ rebħiet u draw filwaqt li l-Italja kisbet tliet rebħiet konsekuttivi. Fir-round tal-aħħar sittax, l-Ingilterra għelbet lill-Ġermanja 2-0 filwaqt li l-Italja eliminat lill-Awstrija 2-1 wara l-ħin barrani.
Din tkun l-ewwel finali bejn iż-żewġ nazzjonijiet f’kompetizzjoni maġġuri. Fil-passat iż-żewġ pajjiżi lagħbu 27 partita, bl-Ingilterra tirbaħ 8 filwaqt li l-Italja tirbaħ 11-il darba. L-aħħar darba li ż-żewġ pajjiżi ltaqgħu kontra xulxin f’kompetizzjoni maġġuri kien fit-Tazza tad-Dinja fl-2014 fejn dakinhar l-Italja kienu eliminat lill-Ingilterra b’rebħa ta’ 2-1.
Fil-kwartifinali, l-Italja se jkunu qed jaffaċjaw l-itqal test s’issa f’din il-kompetizzjoni hekk kif jilagħbu kontra wieħed mill-favoriti li jirbħu dan it-tournament, il-Belġju. Minn naħa l-oħra l-Ingilterra se jilagħbu kontra l-Ukrajna. Jekk iż-żewġ nazzjonijiet jikkwalifikaw, l-Italja tilgħab kontra min jirbaħ bejn l-Iżvizzera u Spanja filwaqt li l-Ingilterra tilgħab kontra r-rebbieħ ta’ bejn Danimarka u Repubblika Ċeka.
