Fl-Ingilterra il-bars u l-‘pubs’ se jitħallew miftuħa sal-11.15pm għall-finali tal-Euro 2020 nhar il-Ħadd li ġej. Dan se jseħħ f’każ li l-finali tispiċċa tmur għall-ħin barrani jew saħansitra għall-għoti tal-penalties. B’hekk il-bars se jdumu miftuħa 45 minuta iktar milli jistgħu bħalissa, hekk kif il-ħin li fih iridu jagħlqu hu dak tal-10.30pm.
Aktar kmieni lbieraħ il-Gvern Ingliż ikkonferma wkoll li fid-19 ta’ Lulju se jirritornaw l-attivitajiet sportivi b’attendenza massima fl-Ingilterra.
Sadanittant fiż-żewġ semifinali ta’ llejla kif ukoll ta’ għada, Wembley Stadium se jkun qed jospita ‘l fuq minn 60,000 persuna għall-ewwel darba wara l-pandemija tal-Covid 19.
