Illum l-Awtorità tal-Ippjanar għandha tiddeċiedi dwar l-applikazzjoni biex twessa t-triq mir-Rabat, Għawdex, għal Marsalforn, proġett li l-għaqda Flimkien għal Ambjent Aħjar (FAA) qed issejjaħ wieħed ta’ “qerda oħra ta’ aktar art agrikola mhux ġustifikata sabiex tagħmel spazju għal aktar karozzi, fi triq li rari tkun konġestjonata.”
Flimkien għal Ambjent Aħjar sostniet li għal darb’oħra, il-proċess ta’ ppjanar ta’ Malta reġa’ wera nuqqas ta’ governanza tajba. Minkejja li dan il-proġett se jneħħi 10,693m kwadru ta’ art agrikola, jeqred 300 siġra, li minnhom 44 huma speċi protetti, għandhom impatt fuq passaġġ tal-ilma u pajsaġġ kulturali, l-Awtorità tar-Riżorsi Ambjentali (ERA) li l-FAA qalet li hi kkontrollata mill-Gvern, ikkonkludiet li dan il-proġett ma jeħtieġx EIA. L-analiżi tal-ERA dwar l-applikazzjoni għadhom ma sarux disponibbli għall-pubbliku.
L-FAA saħqet li din tal-aħħar, tkompli ma’ rekord twil ta’ stanzi fejn Infrastructure Malta tinjora d-direttivi tal-UE u dawk Maltin dwar l-informazzjoni lill-pubbliku dwar proġetti ambjentali, u ripetutament naqset milli twettaq konsultazzjoni pubblika dwar proġetti kbar. L-istqarrija kompliet tgħid li kull ma jmur, l-EIAs jew qed jitneħħew jew jitwettqu b’tali mod li ma jirrappreżentawx is-sitwazzjoni vera, sabiex jiġi żgurat li l-proġett jiġi approvat.
Il-Valutazzjonijiet tal-Impatt Ambjentali huma għodod ewlenin tal-ippjanar sabiex jiġi żgurat li l-proġetti jiksbu l-aħjar riżultat ambjentali possibbli, u huma obbligatorji għal proġetti kbar. Huwa għalhekk li l-FAA ġabet din is-sitwazzjoni għall-attenzjoni tad-Direttorat Ġenerali tal-UE għall-Ambjent. Il-FAA enfasizzat ukoll il-fatt li l-finanzjament tal-UE qed jintuża biex jikser il-valuri tal-UE, permezz tal-qerda ta’ siġar u art agrikola, billi jiżdied l-użu ta’ vetturi privati minflok ma jissaħħaħ it-trasport pubbliku, u b’hekk jiżdied it-tniġġis tal-arja u t-Tibdil fil-Klima.
Il-Wied ta’ Marsalforn huwa l-akbar sistema ta’ wied f’Għawdex, sostnut minn netwerk li jipprevjeni l-ilma tax-xita milli joħroġ fil-baħar, u minflok isostni l-uċuħ tar-raba’ fl-akwati. FAA qalet li “il-qerda ta’ din is-sistema sabiex tkompli twessa’ ftit kuntratturi tat-toroq u tħeġġeġ aktar karozzi tmur eżattament kontra l-għan tal-Fond Agrikolu Ewropew għall-Iżvilupp Rurali (FAEŻR), li ta €8 miljun biex jippromwovi l-effiċjenza tar-riżorsi u jappoġġja l-bidla lejn ekonomija b’livell baxx ta’ karbonju u reżiljenti għall-klima fis-settur agrikolu ta’ Marsalforn.”
Flimkien għal Ambjent Aħjar isejjaħ lill-Awtorità tal-Ippjanar biex titlob studji sħaħ u indipendenti għal dan il-proġett, qabel ma tgħaġġel.
